PM:06:55:18/03/2023
548 جار خوێندراوەتەوە
+
-
پشتی گڤاشتنێن
نیڤدەولەتی ب ئاوایەکێ بەردەوام و هاتنا هەر شاندەکێ بیانی بۆ هەرێمێ، ب تایبەتی
وەزیرێ بەرەڤانیا ئەمریکا کو داخازا ئەنجامدانا هەلبژارتنێ ل هەرێمێ دکەن، مەسعود
بارزانی ڕاگەهاند، بۆ وێیەکێ شەرعیەت ل هەرێما کوردستانێ نەکەڤیتە ژێر پرسیارێ
پێتڤیە ئەڤ سالە هەلبژارتن بهێنەکرن.
بارەگایێ بارزانی
ڕاگەهاندنەک بەلاڤکریە و تێدا هاتیە، مەسعود بارزانی سەرۆکێ پارتی ل سەلاحەدین
مێهڤانداریا ژمارەیەکا زۆرا بالیۆز و کونسول و نوینەرێ وەلاتان و رێکخراوێن
نیڤدەولەتی و هێزێن هەڤپەیمانان ل عێراق و هەرێما کوردستانێ کریە و نیڤرۆیەکا
خارنێ ژی رێکئێخستیە.
ئاماژە ب وێیەکێ
ژیکریە، مەسعود بارزانی، تەکەز ل سەر ڕەوشا سیاسی و پەیوەندیێ دناڤبەرا حکومەتا
فیدڕالیا عێراقێ و حکومەتا دەم بسەرڤەچوویا هەرێما کوردستانێ کریە و ئاماژە ب وێیەکێ
کریە، دەرفەتەکا باش بۆ چارەسەرکرنا ئاریشەیان د هەبوونێ دایە و ئیرادە و خواستەک
ژی دهێتە دیتن بۆ وێیەکێ کو ئاریشە ب لێکتێگەهشتنێ و ب پشتەڤانیێ ب دەستوری و لسەر
بنەمایێ وێ لهەڤهاتنێ چارەسەر بهێتەکرن کو دناڤبەرا ئالیێن پێکئینەرێن
هەڤپەیمانیتیا ئیدارەیا دەولەتێ گرێدایە.
هەر ل دیڤ ڕاگەهاندنێ سەرۆکێ
پارتی سەرەدانا چەند رۆژێن دەربازبووی یا محەمەد شیاع سودانی سەرۆکوەزیرێن عێراقێ
بۆ هەرێما کوردستانێ ب دەرفەتەکا باش بۆ لهەڤتێگەهشتنا زێدەتر دناڤبەرا هەرێم و
حکومەتا فیدڕالی دا دگەل نەهێلانا ناکوکیان وەسفکریە.
ڕاگەهاندنێ بەحسا
وێیەکێ ژیکریە، مەسعود بارزانی بەحسا پرۆسەیا سیاسیا ناڤخۆیا هەرێما کوردستانێ
کریە و تەکەز ل شەرعیەتا هەرێما کوردستانێ ژی کریە کو نەئێخینە د بن پرسیارێ دا و
پێتڤیە ئەڤ سالە هەلبژارتن بهێنە ئەنجامدان.
دبێژیت ژی، سەدەمێ
هەماهەنگیەکا باش دناڤبەرا تیمێن نیڤدەولەتی و ئالیێن پەیوەندیدارێن هەرێمێ دا
هەبە بۆ بەرهەڤیان ژبوی هەلبژارتنا هەرێما کوردستانێ.
دەربارەی پێکهاتان ژی
سەرۆکێ پارتی بەحسا وێیەکێ کر، نابیت چ دەستوەردان د مافێ پێکهاتەیان دا بهێتەکرن
و ئیدرادە و سیغەیەکێ دیارکری بسەر پێکهاتەیێن هەرێمێ دا بهێتە سەپاندن، دڤێت رێزێ
ل ئیرادەیا وان بگرن و پێکهاتە بخۆژی و رێکخراوێن نەتەوەیێن هەڤگرتی هەر سیستەمەکێ
بۆ بەشداریکرنا پێکهاتەیان ب باشی ببینیت ل دەڤ وان ژی پەسەند دبیت.
ئەڤە د دەمەکێ دایە،
سالا دەربازبووی نێچیرڤان بارزانی سەرۆکێ هەرێما کوردستانێ رۆژا ١ی ١٠ی ٢٠٢٢ێ وەکی
رۆژا ئەنجامدانا هەلبژارتنێن پەرلەمانێ کوردستانێ دیارکر، لێ پارتی و یەکێتی ل
رۆژا ٩ی ١٠ی ٢٠٢٢ێ د جڤینا پەرلەمانی دا ب دەنگێ ٨٠ پەرلەمانتاران ژیێ پەرلەمان و
حکومەت و سەرۆکاتیا هەرێمێ هەتا ٣١ی ١٢ی ٢٠٢٣ێ درێژکر.