PM:01:04:08/03/2023
2880 جار خوێندراوەتەوە
+
-
پشتی ئێن ئاڕ تی ل چەند رۆژێن دەربازبووی ئاریشەیا داگیرکرنا زەڤیێن
چەند دەڤەران ل سنورێ پارێزگەها دهۆکێ ژ ئالیێ بەرپرسێن پارتی ڤە ئەشکراری، نها
هەژمارەکا جۆتیارێن سنورێ قەزا سێمێلێ ژی دەست ب خڕڤەبوونا نەرازیبوونێ کرینە و
دبێژن، "رێڤەبەریا خانوبەران یا دەولەتێ هاتیە زەڤیێن مە ژ مە بستینیت و مە
تێدا بکەتە کرێدار".
هەژمارەکا جۆتیارێن گوندێ سەرشۆڕێ ل سنورێ قەزا سێمێلێ خرڤەبوونەکا نەرازیبوونێ
ئەنجامدان و ئێک ژ خڕڤەبوویان بۆ ئێن ئاڕ تی دبێژیت، "ژ سالا ٢٠٠٩ێ و هەتا نها ئیتفای داناینە
سەر زەڤیێن وان ژ ئالیێ باژێرڤانیا سێمێلێ ڤە و ل شوینا وێ زەڤیێن وەهمی داینە
وەلاتیان کو ئەو زەڤیە ل بازاڕی کڕین و فرۆتن پێ هاتیە کرن".
دبێژیت ژی، "نها رێڤەبەریا خانوبەران یا دەولەتێ هاتیە مولکێ وان
ئیتفای بکەت و هندەک ژ زەڤیان حەل بکەن و بکەنە "ئەقارات دەولە" و ژ وەزارەتا
چاندنێ ڤەگۆهێزن سەر ناڤێن خۆ کو ب وێ کریارێ ژی خودانێن زەڤیان دێ بنە کرێدارێ
وان بێ کو چ قەرەبوویەکێ بدەنێ و سالانە ژی کرێ کۆژمەکێ خەیالی یێ پارەی دبیت کو
دێ ژ وان هێتە وەرگرتن".
ئاماژە ب وێیەکێ ژیکر، "سەنەد ب وان
زەڤیان هەنە و ژ سالێن ١٩٥١ێ وەرە ئەو خودانیێ لێ دکەن و ب پارەیێن خۆ کڕینە کو
هەژمارا وان هزار و ٩٧٦ دۆنەمێن عەردی نە و مولکێ نێزیکی ١٠٠ جۆتیارنە".
هەڤدەم،
خڕڤەبوویەکێ دی ژی دبێژیت، "هەیاما ١٤
سالانە نە ئیتفا دکەن و نە دهێلن کەس شولەکێ تێدا بکەت، کو سەر دەمێ سەدامی کەسی ژ
مە نەستاندیە نها ئەڤە یێت هاتین دبێژن دڤێت هوین بدەنە مە و ئەم ژی ب چ ڕەنگا
لسەر ڤێ یەکێ ڕازی نابین".
ئەڤە
د دەمەکێ دایە، بەریا نها ژی ئێن ئاڕ تی ئەشکرا کربوو ل سنورێ پارێزگەها دهۆکێ
زەڤیێن چەندین گوندان کو باشترین زەڤی بووینە هاتینە داگیرکرن ژ ئالیێ بەرپرسێن
بلندێن حزبی و حکومی یێن پارتی ڤە و پرۆژە و ڤیلا بۆ کوڕ و کچێن سەرکردەیێن خۆ
لسەر ئاڤا کرینە.