سەرنووچە:

هەوارەک ژ بۆ خلاسبوونا گەنجان!

4/10/2021 3:51:46 PM
1348 جار خوێندراوەتەوە
جاسم محەمەد شەرنەخی
+ -

ئەو چاخێ هەردوو فاکتەرێن پێدڤى ژبۆ سەرکەفتنێ (چالاکى- ئەقل) لێ کووم دبن گەنجینیە، ژبەرکو زاڕۆکان چالاکى و لەشسڤکى هەیە لێ هێزا ئەقلێ ل دەڤ وان یا کێمە، و دانەعەمر و کالەمێران حیکمەت و ئەقل هەنە، لێ دبت لاوازیا جەستەیێن وان نە ئالیکارێ وانایە!.

لەوا سامانێ هەر مللەتەکێ یێ مەزن ژبۆ پێشەڤچوون و شارستانیێ ئەلبەت گەنجن، ژبەر وێ یەکێ دڤیا گرنگێدان ب ڤێ تەخێ ل پێشیا هەمى تەخا، و ل بەراهیا هەر تشتەکی دیتربا، لێ مخابن ل وەڵاتێ مەیێ هەمى تشت تێدا بەرۆڤاژ دهێنە گێران گەنج ژ هەمیا بێ چاڤدێرى و بێ خوداانترن.

ژبەر پەراوێزیکرنا گەنجێن مە ژمێژوەرە کوردستان ل وان تاریبوویە، و بەرێ دلێن وان بەریا ئەنیێن ڕویێن وان کەفتیە وان وەڵاتێن د کەڤنە پشت دەریا و ئوقیانووسان، و بەهرەکا مەزن جانێن خوە کرینە د لەپێن خوەدا و گازی دکن ئوڕۆپا تو ل کیڤەیى، ویێن پێ چێنەبن ژى ئاخینکاڕادهێلن.

گەلۆ ئەو کوردستانا ب خرابکاریێ شەوتى نەبت وارەکێ دیتر ل سەر ڕویێ ئەردى هەیە حەفت ساڵان دەرگەهێن دامەزڕاندن و بکارئینانا گەنجێن چەکدار ب زانست و فێربوونێ لێ هاتبیتە داخستن، ل وى دەمێ نێزیکى سێ چارێک ملیون بندیوارێن – گەلەک ژوان دانەعەمەر و بەهرەک مەزن ژێ نە خواندەوار و جاهل ب پلەیێن فەرمانبەریێن جودا جودا یێن مافێن گەنجێن قوتابى و دەرچوویان دخۆن؟!

بۆ سەد وپنجی هزار گەنجێن ژ ساڵا۲۰۱٤ وەرە و هەتا نها ژی دەرچووین داهات نینە پێ دامەزرینن، لێ بۆ حەفت سەد و پینجی هزار بندیواران مشەیە و تەمامە!

و ل سەر ئاستێ سیاسی و ئیدارى ژى یا خویایە چەند ستەم ل کور و کچێن مەیێن گەنج دهێتە کرن، و چەوان ڕێکا ل وان تەنگاڤ دکن نە گەهنە جهێن بڕیارێ، و ب چاڤەکێ زۆر کێم و نزم بەرێخوەدان ل ئەقل و شیانێن وان دهێتەکرن!

هەر چەندە زۆر جاران ئەڤ لایەنێ سیاسى و یێ دیتر هندەک ڕەفتار و سەرەدەریێن دیکۆرى و فۆرمالیست یێن نە گەوهەرى ئەنجام ددن، و دەنە پێشچاڤ کو ئەو چەندە ڕێ ڤەکرنە ل گەنجان و خەمخوارنە ژوان، مینا ڕیکەفتنەکێ ل ڤێرێ و ل وێراهە ل سەر دەینانا کەسەکێ نەیێ (پیر و کال) ل سەر پۆستەکێ حزبى یانژى ئیداری!

لێ هەتا نها خوە تێ ناگەهینن، ونەڤێن خۆ تێ بگەهینن ژى کو کێشەیا گەنجێن کورد زۆر مەنترە ژ کورسیا پۆستەکێ و ڕێڤەبەرییەکێ، ل بەر چاڤێن مە سەدەها هزار گەنجێن بێ کار و زڕبەهر و دەست و بەریک ڤالا یێن هەین نکارن وەکى مرۆڤان زکتێر و سەرفەراز و دلخۆش بژین، دێ گەنج چ ل پۆستەکێ هاتیە دان بۆ کەسەکێ جوانێ ئەقل پیر یێ گوستیل د تبلا مەزناندا دکن؟!

دەمێ وژدان د لڤت هەمى کەس دزانت خەمخوارنا ژ گەنجان ئەوە: نە هێنە بێ بەهرکرن ژ هەمى ماف و پێدڤیێن وانێن ڕەوا و سرۆشتى، دەست پێ بکە ژ پێدڤیێن فسیولۆژیێت ژیانێ وەکى خوارن و هەڤژینیێ و هەتا ب گەهیە کوپیتکا هەرەمێ ماسلۆ: ( پێکئانینا خۆیەتی– Self realization )، ومافێ بەشداریا د ڕێڤەبرن و سەرکێشیێدا، بڕاستى ئەڤا دهێتە ئەنجامدان تۆزهاڤێتنا د چاڤاندایە، و خاپاندنا سۆر ب سۆرا گەنجانە، و تڕانە پێکرنە ب ئەقلێ وان!

و تڕانپێکرنەکا دیترژى ب ئەقلێ گەنجان دهێتە کرن دەمێ مرۆڤێن ب ناڤ ساڵانڤە چووین بەڕەئاژۆتن جهتەنگاڤرنێ ل گەل گەنجان دکن، وبێژییە وان: گەلی برا گەنج، ئێکسەر دێ بەرسڤا تە دن: ئەم ژى گەنجین، بەرێز ئەم نە بەحسێ لێ گەڕیانا ژنا دویێ  بۆ جەنابێ وە دکین، ئەم یێ ل دۆر کێشەیەکا جڤاکیا نیشتمانیا مەزن د پەیڤین!

دلسۆزى بۆ گەلى مە و پاشەڕۆژەکا گەش ژ بۆ کوردستانێ ژ لایەکێڤە ، و ژلایەکێ دیترڤە هەستا بەرپرسیێ ژ ستەمێ گفاشتن ل سەر وژدان و گیانێ من کرینە – وەکو کەسەکێ ئەڤە نێزیکى بیست سالانە ژ چاخێ گەنجینیێ دەربازبووى – هەوارەکا هۆسان یا خەلاسکرنا گەنجان بلند بکم، و داخوازا ڤەگەڕاندنا مافێن وان د جڤاکێ مەیێ پاشڤەمایێ ستەمکاردا بکم...و خۆدێ ل پشت نیازێیە.