سەرنووچە:

بۆ نەھێلانا بێکاریێ، کەرتێ تایبەت د دەستێ کەرتێ حزبی دا بیننەدەر​

2/23/2021 10:04:22 PM
2817 جار خوێندراوەتەوە
سەردار ھێتوتی
+ -

پشتی ساڵا ٢٠١٤ و دگەل ھاتنا ھێزا ڕەشا ئیسلامی یا ب ناڤێ داعشێ، بێکاری ل ھەرێما کوردستانێ گەھشتیە گوپیتکێ و حکومەت ژی ژ بەر نەبوونا پلانێن کاری دئاست گەنجان بێ دەنگ مایە.

ڤێ بێکاریێ ھەمی توخیب بەزاندن و گەنج بێ ھیڤیکرنە و ڕێیا وان دایە ئیجە ژ سەخمەراتی پاریەکێ نانی و ژیانەکا ب ڕومەت و ئارام، ھەر چەندە وان وەڵات و ئاخ و ماڵبات ل پاش خۆ ھێلان لێ وان دەروونەکێ ئارام پەیداکر کو ھەست ب مرۆڤبوونا خۆ بکەن.

چ ئەگەر ل پشت بێکاریا ل ھەرێما کوردستانێ ھەنە؟ ئایا ئەڤ سیاسەتا وان یا کاری یا دارێژتیە یان ژی ژ نەچاریێ یە؟.

گەلەک ئەگەر ل پشت ڤێ بێکاریێ ھەنە، د سەری دا نەبوونا پلانا حکومەتێ وەک حکومەت و ڕێڤەبەرا ھاوڵاتیان و پاشان ھەبوونا ھژمارەکا زێدە مەزن ژ مافیایان د ئاست ڕێڤەبرنا دەوڵەتێ دا، و ھەبوونا گەندەلیەکا زێدە کو دچیتە د خانا تاڵانکرنا مالێ دەوڵەتێ، ل ھەرێما کوردستانێ ھەر تشت ل ژێر دەستێ حکومەتێ ھاتیەدەرێ وەک کارەب و ئاڤ و ساخلەمی و پەروەردە و خاندنا بڵند و ئاڤەدانی و ڕێک و پر و تورێن گەھاندنێ و ھەر ھەمی ب زانابوونا ژ لایێ ڕێڤەبەرێن دەوڵەتی کەفتینە لژێر دەستێ کەرتێ حزبی و حکومەت ئیفلج کریە و ئێخستیە سەر لنگان و نەشێت ڤەلڤیت.

ئەڤ سیاسەتە ژی ب پلان دارێژتی و ب ساڵانە کارێ لسەر دھێتە کرن و ئەگەر ھەر ب ڤی ڕەنگی بیت دڤێت د دەمەکێ نێزیک دا ناڤێ جڤاتا وەزیران ببیتە جڤاتا کومپانیان ژ بەر کو چ تشت ل ژێر ناڤێ وزارەتان ل ھەرێمێ نەمایە و ھەمی کەرتێن ژیانێ د دەستێن کۆمپانیان دانە.
بێکاریا نوکە ئەنجامێن ڤێ قورخکاریا زۆر یا کۆمپانیێن حزبیە چونکی ب تنێ ئەڤ کۆمپانیە بۆ بەرژەوەندێن خۆ کار دکەن و بۆ وان نەخەمە بێکاریا گەنجان.

لەوما دڤێت خەلک ب ھشیاری بێژیت ئێدی ھەیبەتێ بۆ حکومەتێ ڤەگەرینن و نابیت کۆمپانی مە برێڤەببەن و نابیت ژیانا ھەرێمێ د دەستێ کەرتێ حزبی دا بیت و دڤیت ب پلان و بەرنامە ھەر تشت بکەڤیتە د دەستێ کەرتێ تایبەت دا و ب ئازادانە خەلک ژ وی کەرتی یێ مفادار بیت.