سەرنووچە:

عەشیرەتێن بادینان و بێ سەری

7/17/2020 9:33:03 PM
1633 جار خوێندراوەتەوە
عومەر محەمەدتاھر
+ -

ل باشورێ کوردستانێ و ل بادینان عەشیرەت و عەشیرەتکانێ ب شێوەکێ دیار و بەرفرەھ ھەیە و یا زاڵە بسەر جڤاکی ل پتریا روویان ڤە. یا من دڤێت لسەر باخڤم عەشیرەت و باشی و خرابیێت عەشیرەتێ نینە بەلکو تایبەتە ب (بێ سەری) یا عەشیرەتێن بادینان.

ل بادینان ئاغا ھەر ئێک ژ لایێن خۆڤە خۆ دبینن مەزن و رابەر و کەس خۆ کێمتر دانانن ل یێن دی ئەڤە ژی لڤێرێ تشتەک نۆڕمالە لێ تشتەک دی گرنگ ھەیە ئاماژێ پێ بدەین ئەو ژی دووڕوویا پتریا ئاغایێن بادینانە ب وێ یەکێ کو پتریا وان ھەمان عەقلیەتا ساڵێن پێش راپەڕینێ ھەیە و ئامادە نینن ل ژێر ناڤێ حکومەت و دەولەتێ دبن فەرمانا چ عەشیرەتێن دی دابن و دیرۆکا کوردان شاھدە کو ھەر عەشیرەتەک و ئاغایەک ل دەڤەرەکێ ھەول دایە دەسکەفتەکی ب دەست خۆڤە بینیت چ بۆ فەرمانرەواییا خۆ و عەشیرەتا خۆ یان ژی بۆ مللەتێ خۆ وەک کورد ژ لایێن ئاغا و رابەرێن عەشیرەتێن دی ھەولا ژناڤبرنێ دایە لێ دنوکە دا ئاغایێن عەشیرەتێن دی ل بن دەسھەلاتا کوردی(دەسھەلاتا بارزانیا دھزرا وان) خۆ بێ دەنگ کریە و ھەر ئێک بۆ مەێلەحەتا خۆ یا کەسی دخەبتیت و بۆ وی گرنگ نینە عەشیرەتا وی د چ بارودوخ دا دژیت و پتریا وان خودان پلە و پۆستن یان دەرفەتەک وەسا ھەیە کو بشێن ل خێر و بێرێن ڤی وەلاتی مفادار بن ئەڤە ددەمەکی دایە کو پتریا وان ددەمێ خۆدا دگەل رژێما بەعس و حکومەتا عێراقێ بوون و دژایەتیا کەورد و پێشمەرگان دکر لژێر ناڤێ ((شەڕێ عەشیرەت دگەل عەشیرەتێ))و نوکە ژی ب ھزاران دەرچویێن زانکۆیان ھەنە دڤێت واستەی ب ڤان ئاغایان بکەن ھەتا ببن خودان کار ددەمەکی دا کو ھەکە رۆژەک بھێت قەوارا ھەرێمێ و حکومەتا کوردی بکەڤیتە بن مەترسیێ کەسێن ئێکێ ئەڤ ئاغایە دێ بن کو ب عەقلیەتا بەری راپەڕینا ١٩٩١ دێ دژایەتیا حکومەتا کوردی کەن و ھەولا ژناڤبرنێ دەن و حکومەتێ ب دەسھەلاتا عەشیرەتێ( بارزانیا) دزانن و رق و کینەک ھەری مەزن دناڤ ناخێ وان دا ھەیە لێ بێ جورئەتی و بێ ئیڕادەییا وان ناھێلیت نوکە ھەلویستەک روون و ئاشکرا ھەبیت  کو د عەقل و ناخێ وان دا بەرنامە ڕێژکریە و عەشیرەتێن بادینا مینا لاشەکێ بێ سەر ب دیار دکەڤن و ھێشتا ژی خەلکەک زۆر ھەیە و دناڤ واندا ژی کەسێن خودان بروانامە و خویندەوار کو دبن کۆیلە بۆ ڤان ئاغایان و ئەو ژی ڤێ یەکێ ب دەرفەت دبینن کو گرنگی ب وان بھێتە دان ژلایێ حکومەت و دەسھەلاتا کوردی.

ل ڤێرێ پرسیارا من بۆ حکومەت و دەسھەلاتا کوردی ئەوە:( ئەرێ ما دەم نەھاتیە وێ سیاسەتێ بھێلن یا کو دبێژیت تنێ سەرێ ماری بگرن لاشێ دی ھەمی کۆنتڕۆل کریە و دەم نەھاتیە ئیدی ئاغایان نەکەن خودان پلە و پۆست و ئیمتیازات لسەر حسابا خەلکێ ژار و کوردپەروەر ەو پتریا ڤان ئاغایان ھیڤیا کورترین و کێمترین دەرفەت دخوازن دا دژی دەسھەلاتا کوردی(دەسھەلاتا عەشیرەتێ ب ھزرا وان) رابن و لناڤ ببەن؟ ئەو گەنج و خەلکێ خودان بروانامە ژی کو دڤێت بۆ بدەست ڤەئینانا کاری پتریا جاران واستەی ب ڤان ئاغایان بکەن ئامادەنە ل بن ھەر ناڤەکی و ب ھەر حالەکی بیت کوردستان و حکومەتا کوردی بپارێزن و بەردەوامیێ بدەنە دۆزا رزگاریخوازیا کوردی).

ئەرێ مادەم نەھات خەلک ژی ڤێ (بێ سەری) ێ قەبیل نەکەت؟ب کۆرەیی ملکەچ و خزمەتکار نەبیت و ئەو ئاغایێن خۆ ب خودانێ خەلکێ خۆ دزانن رێز لێ بھێتە گرتن و عەشیرەتێ وەک خێزانەکا مەزن ببینن کو دڤێت خێزانێ ژی مەزنەک ھەبیت لێ ئەو ئاغایێن دیف مەێلەحەت و رۆژا خۆنە ئێدی چ حساب بۆ نەھێتەکرن و دەست بۆ ل سنگی نەھێتەدان.

ل دوماھی ھیڤیدارم حکومەت و دەسھەلاتا کوردی ڤێ نادادیێ ئێدی نەھێلیت چونکو ئەو ژی باش دزانیت کو وان ئاغایان چەند رق و کین ل ھەمبەر وانا ھەیە.

- ھیڤی دکەم گەنج گرنگیەکا زێدە بدەنە ڤی بابەتی و تێبینی و پێشنیار ھەبن و کار لسەر بھێتەکردن کو چیدی نەبینە ھێز و چەکێن چەند کەسان ب ناڤێ ئاغا و رابەرێن عەشیرەتان