سەرنووچە:

ڤیدیۆ.. ل قەزا شێخان شەڕ دناڤبەرا دوو مالباتان دا روویدا و کوشتی و بریندار هەنە

فۆتۆ: 
2021-05-09

672 جار خوێندراوەتەوە

د شەڕی دناڤبەرا دوو مالباتاندا ل سنورێ قەزا شێخان کەسەکی ٤٠ سالی هاتە کوشتن و دوو کەس برینداربوون، ژێدەرەکی ژ پۆلیسێن شێخان ژی ڕاگەهاند، ب وێ سەدەمێ ١٠ کەس هاتنە دەستەسەرکرن.

هێمن سلێمان پەیڤدارێ پۆلیسێن دهۆکێ ڕاگەهاند، ئێڤاریا ئەڤرۆ دەمژمێر ٧:٣٠ێ ل گوندێ تاق حەرب یا سەر ب قەزا شێخان ڤە شەڕ دناڤبەرا دوو مالباتان دا روویدا و کەسەکی ٤٠ سالی بناڤێ (ح. ش. ٲ) هاتە کوشتن و دوو کەسێن دی ژی برینداربوون.

ئاماژە ب وێیەکێ ژی کر، پشتی شەڕی دەملدەست پۆلیسێن قەزا شێخان گەهشتنە جهێ بویەرێ و شەر کۆنترۆلکرن. گوت ژی، لگۆرەی ڤەکۆلینێن دەستپێکی شەڕ بسەدەما ئاریشەیەکا عەشایری بوویە.

هەڤدەم، شێخ مەیسەر زەکلاب موختارێ وی گوندی بۆ ئێن ئاڕ تی ئاشکراکر، د شەڕی کو ئێڤاریا ئەڤرۆ ل گوندێ وی روویدای دوو کەس برینداربوونە و هاتنە ڤەگوهاستن بۆ نەخوشخانا شێخان.

هەروەسا ژێدەرەکی ژی ژ پۆلیسێن شێخان ژی کو ل جهێ بویەرێ ئامادەبوو بۆ ئێن ئاڕ تی ڕاگەهاند، بسەدەما وی شەڕی ١٠ کەس ب چەکێ وان ڤە هاتنە دەستبسەرکرن و بکوژێ زەلامێ ٤٠ سالی ژی دناڤا وان دایە.  

ئەڤە ددەمەکی دایە، دوو شەڤێن دەربازبووی ژی ل ناحیا کەلەکچی بسەدەما ئاریشەیەکا جڤاکی شەڕ دناڤبەرا دوو مالباتاندا روویدا و ژن و مێرەک کو هەڤژین بوون و دەیک و بابێن حەفت زارۆکان بوون هاتنە کوشتن و چارکەسین دی ژی برینداربوون.

و.ح