سەرنووچە:

سزادایێن بەهدینان پەیوەندی ب مالباتێن خۆ کرن

فۆتۆ: 
2021-05-08

1745 جار خوێندراوەتەوە

پشتی پەسەندکرنا سزایێ شەش سالێن زیندانکرنێ ژ ئالیێ دادگەها پێداچوونا هەرێمێ بۆ جارا ئێکێ یە سزادایێن بەهدینان پەیوەندی ب مالباتێن خۆ کرن. هەڤدەم، هاریوان عیسای داخازا کەلوپەلان ژ مالباتا خۆ کربوو لێ پەیوەندیا وی هاتبوو بڕین.

مالباتا هاریوان عیسای بۆ ئێن ئاڕ تی ڕاگەهاند، ئەڤرۆ هاریوانی پەیوەندی ب وان کریە لێ پەیوەندیا وی بتنێ بۆ یەک خۆلەک درێژبوو و نەهێلان ب درێژی باخڤیت و داخازیێن خۆ ژ وان بکەت، پشترە پەیوەندی هاتە بڕین.

گوت ژی، هاریوانی داخازا جلوبەرگان کریە، لێ بەریا نها ئەوان چەندجاران خواستیە کەلوپەلێن پێتڤی بۆ ببەن ئاسایشێ رێک ب وان نەدایە.

هەڤەدەم، مێهڤان سەعید برایێ شڤان سەعید بۆ ئێن ئاڕ تی ڕاگەهاند، ئەڤرۆ شڤانی پەیوەندی ب خێزانا خۆ کریە و پسیارا ڕەوشا وان کریە و د پەیوەندیێ دا شڤانی پسیارا جلوبەرگێن جەژنێ بۆ زارۆکێن خۆ کریە و گوتیە دخەما مەنەبن و مورالا مەیا بلند.

بەحسا وێیەکێ ژی کر، ژ ئاخفتنێ دیاردبوو کو شڤانی دخواست زێدەتر باخڤیت و رەوشا خۆ بەحس بکەت لێ لبن سانسورێ دا بوو و نەشیا ژبەرکو ئەگەر تشتەک جیاواز گوتبا وەکی هاریوانی دا پەیوەندیا وی هێتە بڕین.

ئەڤە ژی د دەمەکیدایە، نێزیکی حەفت مەهانە چەند رۆژنامەڤان و چالاکڤانێن مەدەنی ل بەهدینان هاتینە دەستەسەرکرن، ل ١٦ی مەها سباتا ئەڤسالەدا ژی ل دادگەها تاوانێن هەولێرێ دادگەهکرنا پێنج ژ وان برێڤەچوو و تێدا دادگەهێ بڕیارا سزایێ شەش سالێن زیندانکرنێ بۆ هەر ئێک ژ وان دەرخست.

هەڤدەم، ل گۆرەی بەیاننامەیەکا دادگەها پێداچوونێ ل ٢٨ی نیسانێ، دادگەها تاوانێن هەولێرێ بریارا شەش سالێن زیندانکرنێ بۆ وان هەر پێنج رۆژنامەڤان و چالاکڤانێن بەهدیناندا سەپاندی پەسەندکر و ڤێ یەکێ ژی کارڤەدانێن مەزن لسەر ئاستێ نافخۆ و دەرڤە لدیف خۆ ئینان.

مێری زەید، دهۆک

و.ح