سەرنووچە:

جڤاتا دادوەری و دادگەها هەرێمێ: مە کۆنسۆلخانە ب تۆمەتبار نەزانینە

فۆتۆ: 
2021-05-08

321 جار خوێندراوەتەوە

لسەر سزادایێن بەهدینان، جڤاتا دادوەری و دادگەها پێداچوونا هەرێما کوردستانێ د زەلالکرنەکێ دا بەحسا وێیەکێ کرنە، "تاوانباران د دانبپێدانێن خۆ دا ناڤێ کۆنسۆلخانەیێن ئەڵمانیا و ئەمریکا ئینایە، دادگەهێ کۆنسۆلخانە ب تۆمەتبار نەزانینە".

دبێژیت ژی، "ئەوێ بڕیارێ هێشتا پلا داویێ وەرنەگرتیە و قوناغا تانەلێدانێ مایە، کو ئەو ژی قوناغا داخازکرنا ڕاستڤەکرنا بڕیارا پێداچوونێ یە (طلب تصحیح القرار التمییزی)، لدیف یاسایێ، سزادای دشێن تانێ پێشکێشبکەن، بۆ ڕاستڤەکرنا بڕیارێ.

 ئاماژە ب وێیەکێ ژی کریە، "بەشەک ژ کارڤەدان و هەلویست دەرخستنێ دچنە دخانا دەستوەردانێ دا لسەر کاروبارێن دادگەهان و رێزنەگرتنە ل سەربەخۆیا دادوەری".

دبێژیت ژی، "ئەرکێ مە و هەموو وەلاتیان و ئالیێن سیاسی و مەدەنی کو پابەندبین ب سەربەخۆیا دەستهەلاتا دادوەری و حوکمێ یاسا و بڕیارا دادگەهان".

بەریا نها دادگەها پێداچوونا هەرێما کوردستانێ بریارا دادگەها تاوانێن هەولێرێ ب سزایێ شەش سالێن زیندانکرنێ بۆ پێنج رۆژنامەڤان و چالاکڤانێن بەهدینان پەسەندکر.

لسەر وی بابەتی، کۆنسۆلێ گشتیێ ئەمریکا ل هەولێرێ بۆ ئێن ئاڕ تی بەحسا وێیەکێ کر، "ئەمرکیا هەر ژ دەستپێکێ پشتەڤانیا ئازادیا ڕادەربڕینێ و میدیایێ کریە".هەڤدەم، کۆنسۆلخانەیا ئەڵمانیا ل هەولێرێ ڕاگەهاند، "بڕیارا دادگەهێ بێ ڕامانە و بەروڤاژی گیانێ پەیوەندیا دوستینیا دناڤبەرا مە و هەرێما کوردستانێ دایە".

ئەڤەژی د دەمەکی دایە، نێزیکی حەفت مەهایە چەندین رۆژنامەڤان و چالاکڤانێن جڤکا سڤیل ل بەهدینان هاتنە دەستەسەرکرن، و ل ١٦ی  مەها سباتا ئەڤ سالە ژی ل دادگەها تاوانێن هەولێرێ دادگەهکرنا پێنج ژ وان دەستەسەرکریا ب رێڤەچوو و تێدا دادگەهێ بڕیارا سزایێ شەش سالێن زیندانکرنی بۆ هەریەک ژ وانا دەرخست.

و.ح