سەرنووچە:

کەنەدا لسەر سزادایێن بەهدینان هەلویستێ خۆ ڕاگەهاند

کەنەدا گەلەک دل گرانە
فۆتۆ: 
2021-05-08

228 جار خوێندراوەتەوە

نڤیسینگەها بالیۆزخانا کەنەدا ل هەولێرێ ڕاگەهاند، "کەنەدا گەلەک دل گرانە ب سزادانا رۆژنامەڤان و چالاکڤانان ل هەرێمێ".

نڤێسینگەها بالیۆزخانا کەنەدا ل هەولێرێ د تویتەکیدا دیارکریە، کەنەدا گەلەک دل گرانە ب سزادانا رۆژنامەڤان و چالاکڤانان ل هەرێمێ.

ئەوژی دیارکر، ڕاگەهاندنا ئازاد و سەربەخۆ بناغەیێ دیموکراسیێ یە، ڕاگەهاندکار و هزروبیرێن جۆدا وەک ئۆکسجینێ گرنگە بۆ جڤاکەکێ ئازاد و هشیار و گشتگیر.

پشتی بڕیارا سەروکایەتیا  دادگەها هەریما کوردستانێ، کۆنسولخانا ئەلمانیا ل هەولێرێ، دەربارەی پەسەندکرنا سزایێ شەش سالێن زیندانیکرنێ بۆ شەش رۆژنامەڤان و چالاکڤانێن بەهدینان ڕاگەهاند، "بڕیارا دادگەهێ بێ رامانە و بەرۆڤاژی وی گیانێ پەیوەندیا دۆستانەیە و نێزیکی دناڤبەرا ئەلمانیا و هەرێما کوردستانا عێراقێ یە."

هەڤدەم کۆنسولخانا گشتی یا ئەمریکا ل هەولێرێ د لێدوانەکێدا تایبەت بۆ ئێن ئاڕ تی هەلویستێ خۆ دەربارەی پەسەندکرنا سزایێ شەش سالێن زیندانیکرنێ بۆ شەش رۆژنامەڤان و چالاکڤانێن بەهدینان دیارکر، "ویلایەتێن هەڤگرتیێن ئەمریکا هەر ژ دەستپێکێ پشتەڤانیا ئازادیا ڕادەربڕینێ و میدیایان کریە".

رۆژا شەشی ڤێ مەهێ، سەرۆکایەتیا دادگەها پێداچووونا هەرێما کوردستانێ بڕیارا دادگەها تاوانێن هەولێرێ ب سزایێ شەش سالێن زیندانکرنێ بۆ پێنج رۆژنامەڤان و چالاکڤانێن بەهدینان پەسەندکر.

ئەڤە ژی ل دەمەکیدایە، نێزیکی حەفت مەهانە چەند رۆژنامەنوس و چالاکڤانەکێ مەدەنی ل بەهدینان هاتینە دەستەسەرکرن، ل ١٦ی مەها سباتا ئەڤسالەدا ژی ل دادگەها تاوانێن هەولێرێ دادگەهکرنا پێنج ژ وان برێڤەچوو و تێدا دادگەهێ بڕیارا سزایێ شەش سالێن زیندانکرنێ بۆ هەر ئێک ژ وان دەرخست.

م.م