سەرنووچە:

وەزارەتا کارەبا هەرێمێ: ئامادەینە کارەبێ بۆ پارێزگەهێن دی یێن عێراقێ دابین بکەین

فۆتۆ: 
2021-05-08

235 جار خوێندراوەتەوە

رێڤەبەرێ وەبەرئینانا وزەیا کارەبێ ل وەزارەتا کارەبا هەرێمێ ڕاگەهاند، حکومەتا هەرێمێ ل نهادا ٥٠٠ مێگاواتێن کارەبێ ب سێ پاریزگەهێن عێراقێ ددەت.

دیار بابان رێڤەبەرێ وەبەرئینانا وزەیا کارەبێ ل وەزارەتا کارەبا هەرێمێ بو میدیایێن عێراقی ڕاگەهاندیە، هەرێمێ ئامادەیی دەربریە بۆ پێدانا کارەبێ ب پاریزگەهێن عێراقێ بتایبەت ب وان پارێزگەهێن، کو دشێن سودمەندبن ژ کارەبا هەرێمێ ژ وان ژی نەینەوا و کەرکوک و دیالە.

ئاماژە ب وێ یەکێ ژی کریە، پێدانا کارەبا هەرێمێ ب پاریزگەهێن عێراقێ کاریگەری لسەر رێژا بەرهەمئینانا کارەبێ ل پارێزگەهێن هەرێمێ نابیت.

ئەو یەک ژی بەرچاڤکر، ئەگەر حکومەتا عێراقێ داخازا کارەبێ ژ حکومەتا هەرێمێ بکەت، ئامادەنە کارەبێ پێبدەن بۆ هندێ ژی داخاز ژ بەغدا کریە سوتەمەنیا بۆ بکارخستنا بەشەک ژ وێستگەهان دابین بکەت.

ئەگەر چ تەڤایا کابینێن حکومەتا هەرێمێ سوزا باشترکرنا رەوشا کارەبا هەرێمێ دایە، لێ تا کو نها، سالانە دگەل هاتنا وەرزێ سەرما و گەرمایێ دا ئاریشە و گرفت ژ کێمیا پێدانا دەمژمێرین کارەبێ ل هەرێما کوردستانێ دا یێن هەین.

هـ.ر