سەرنووچە:

بڕیارە ڤالاهیێن ئەولەهی ب هەڤبەشی بهێنە تژیکرن

فۆتۆ: 
2021-05-03

286 جار خوێندراوەتەوە

ئەمیندارێ گشتی یێ وەزارەتا پێشمەرگەی ڕاگەهاند، شەڤا دەربازبووی ب سەرپەرشتیا مستەفا کازمی ل بەغدا جڤینەکا تایبەت ب "گەفێن جدی یێن چەکدارێن داعشێ" هاتە ئەنجامدان و بڕیاردا ڤالاهیێن ئەولەهی ب هەڤبەشی تژیبکەن.

جەبار یاوەر، ئەمیندارێ گشتی یێ وەزارەتا پێشمەرگەی ل فەیسبوکی خۆ بەلاڤکر، شەڤا دەربازبووی "ل بەغدا یا پایتەخت دگەل فەریق جەمال، سەرۆک ئەرکانێ وەزارەتا پێشمەرگەی پشکداربووین د جڤینەکا بەرفرەهـ یا سەربازی و ئەولەهی دا کو ژئالیێ مستەفا کازمی سەرپەرشتی دهاتەکرن و ب ئامادەبوونا وەزیرێ بەڕەڤانیێ و نافخۆ و دارایی یێن حکومەتا فیدڕالی".

ڕاگەهاند ژی، جڤین تایبەت بوویە ب گەفێن جدی یێن داعشێ کو د دەما دەربازبوویدا بسەدەما ڤالاهیێن ئەولەهی و سەربازی دروست کربوون، بوویە سەدەما شەهیدبوونا چەند پێشمەرگەیێن لیوا ١٠ یا وەزارەتا پێشمەرگەی و سەربازێن وەزارەتا بەڕەڤانیێ د حکومەتا فیدڕالی دا.

ئەوژی دیارکر، "بڕیاردا ب چالاکرنا هەماهنگیێ و کارێن هەڤبەش و لژنەیێن هەڤبەش و تیمێن هەڤبەش دناڤبەرا ئارتێشا عێراقێ و هێزێن پێشمەرگەی دا ل سەنتەرێ هەڤبەش یێن دناڤبەرامەدا، تژیکرنا ڤالاهیان و ئالووگورکرنا زانیاریێن هەوالگیری هەیاکو رێگربین ژ دووبارەبوونا کارێن ب ڤی رەنگی و زێدەتر بهێزکرنا ستوینێن ئەولەهی و زێدەکرنا ئۆپەراسیۆنێن هەڤبەش".

هەڤدەم، نڤیسینگەها سەرۆک وەزیرێن عێراقێ د ڕاگەهاندنێ دا ئاماژە ب جڤینا کازمی و فەرماندەیێن هێزێن پێشمەرگەی و هێزێن ئەولەهی کریە.

ل گورەی ڕاگەهاندنێ، کازمی فەرمان کریە ب چالاککرنا دەزگەهێ هوالگێریێ و ئەولەهی و بلەزکرنا لڤینێن ئارتێشێ و دەزگەهێن ئەولەهی و هێزێن پێشمەرگەی ل پێناڤ رێگری کرنێ ژ لڤینێن چەکدارێن داعش و هشککرنا ژێدەرێن وان و لێدانا بنگەهـ و بارگەهێن وان.

ئەڤە د دەمەکیدایە، شەڤا شەمبیێ دەمژمێر ١٢ و ٣٠ خولەک، چەکدارێن داعش ل سنورێ پردێ و ل نێزیک گوندێ قایەباشی، هێرش کرە سەر دوو سەنگەرێن سەربازی یێن پێشمەرگەی و بەرهنگاربوون دناڤبەرا هیزێن پێشمەرگەی و چەکدارێن داعشێ دا درست بوو، کو تێدا شەهید و بریندار ل رێزێن پێشمەرگە یدا کەفتن.