سەرنووچە:

ل خانەقین داعشا دوو وەلاتی رەڤاندن

فۆتۆ: 
2021-05-01

596 جار خوێندراوەتەوە

ژێدەرەکێ ئەولەهیێ ل پارێزگەها دیالە ڕاگەهاند، چەند چەکدارێن سەر ب گروپێ داعش دوو وەلاتی ل گوندێ قایە ل دەوروبەرێن خانەقین رەڤاندینە.

ئەڤرۆ شەمبی، ژێدەرەکێ ئەولەهیێ ل پارێزگەها دیالە ب میدیایێن نافخۆیێن عێراقێ ڕاگەهاند، ل گوندێ قایە ب دووری یا ١٠٠ کیلۆمەترا ژ باکورێ بەعقوبە ل دەوروبەرێن قەزایا خانەقین چەکدارێن داعش دوو وەلاتی رەڤاندینە.

ڕاگەهاند ژی، هێزێن ئەولەهیێ دەستکریە ب پشکنین و ڤەکولینان بۆ سۆراغا وان دوو وەلاتیان و رزگارکرنا وان و دەستەسەرکرنا ئەنجامدەرێن وێ.

دوهی ژی، شەمال ئەحمەد بەرپرسێ ئاسایشا کۆکس ل ناڤچەیا گەرمیان بۆ ئێن ئاڕ تی راگەهاندن ل گوندێ مەحمود عەباسی سەر ب قەزایا خانەقین دوو شڤان رەڤاندن، کو رەڤاندیان ژی جلوبەرگێن سەربازی ل بەربوون، هەروەسا دبێژیت، ئەو شڤان ب رەگەز عەرەب بوون.

هەڤدەم، هەر دوهی ئەینی، ژێدەرەکێ ژ پۆلیسێن پارێزگەها دیالە بو میدیایێن عێراقی ڕاگەهاند، چەند چەکدارێن داعش هێرش کرە سەر بنگەهەکێ سەربازی ل گوندێ ئەحمەد هیلالی سەر ب قەزایا خانەقین و ل ئاکاما بەرهنگاربوونێ دا ژی دگەل هێزێن ئارتێشی، سەربازەک برینداربوو.

دەمەکە داعشا هێرشین خۆ چرکرینە و شەڤا دەربازبووی ژی، هێرش کریە سەر پۆلیسین باژێرکێ داقوق ل نێزیک گوندێ "کەلوزی" ل باشورێ کەرکوکێ، د ئەنجامدا پۆلیسەک هاتە کوشتن و دوو یێن دی ژی برینداربوون.

هـ.ر