سەرنووچە:

سەرۆکێ هەرێما کوردستانێ دەربارەی هێرشێن داعشێ پەیامەک بەلاڤکر

فۆتۆ: 
2021-05-01

243 جار خوێندراوەتەوە

نێچیرڤان بارزانی، سەرۆکێ هەرێما کوردستانێ د پەیامەکێدا کو دەربارەی هێرشێن داعشێ بۆ سەر هێزێن پێشمەرگەی بەلاڤکریە، داخازێ ژ حکومەتا فیدرالی و هەڤپەیمانێن ناڤدەولەتی یێن دژی داعشێ دکەت هێزەکا هەڤبەش ل دەڤەرێن ئاریشە لسەر بهێتە پێکئینان ب ئارمانجا بەرهنگاربوونا داعشێ د دەڤەرێ دا.

دەقێ ڕاگەهاندنا سەرۆکێ هەرێما کوردستانێ:

دەمژمێر ٢١:٣٠ی شەڤا دەربازبووی، چەکدارێن گرووپێ تیرۆریستێن داعش ل میحوەرێ رۆژئاڤایێ کەرکوکێ هێزێن پێشمەرگەیێ کوردستانێ، هێرش کرە سەر سەنگەرێن پێشمەرگەی ل نێزیک گوندێ قایەباشی ل سنورێ باژارۆکێ پردێ ل پارێزگەها کەرکوکێ، د ئەنجامدا سێ پێشمەرگە کو ب قارەمانانە بەرهنگاری داعشێ بووینە، شەهیدبوون.

سەرەخۆشیێ ل بنەمالا هەرسێ پێشمەرگەیێن شەهید دکەین و داخازا چارەسەریەکا بلەز بۆ برینداران دخازین.

مە چەندین جارا حکومەتا فیدرالی یا عێراقێ و هەفپەیمانێن ناڤدەولەتی دژی داعش ژ مەترسیا بهێزبوونا داعش و مفا وەرگرتن ژ بوشایا ئەولەهیێ  یا نافچەیێن کێشە ل سەر ئاگەهدارکرینە، هێرشا شەڤا دەربازبووی یا داعش ل وی میحوەرێ پێشمەرگەی دا هەڤدەم بوو دگەل چەند هێرشێن دی یێن داعش دا.

لڤێرێ جارەکا دی داخازی ژ پەرلەمان و حکومەتا فیدرالی یا عێراق و هەڤپەیمانا ناڤدەولەتی یا دژی داعش دکەین، بلەز کاربکەن لسەر دروستکرنا هێزا هەڤبەش دناڤبەرا پێشمەرگە و ئارتێشا عێراقێ دا ل ناڤچەیێن کێشە لسەر، بۆ هندێ چ دی ئەو ناڤچە وەک کۆریدۆری لڤینین تیرۆرستی ژ ئالیێ داعش نەهێتە بکارئینان، ژبەرکو وێ مەترسیەکا زۆر مەزن لسەر هەرێما کوردستانێ و هەمی عێراقێ و گەفە لسەر ئاسایشا هەمی ناڤچە و جیهانێ. هەرێما کوردستانێ ئامادەیە بۆ هەمی جۆرێن هاریکاریان ژ پیخەمەت دروستکرنا وێ هەڤبەشی و هەماهەنگیێ ب ئاوایەکێ بلەز.

هـ.ر