سەرنووچە:

دەربارەی هێرشێن داعش؛ شەڤا دەربازبووی چ روویدا؟

فۆتۆ: 
2021-05-01

313 جار خوێندراوەتەوە

درەنگی شەڤا دەربازبووی  دەمژمێر ١٢ و ٣٠ خولەک، چەکدارێن داعش ل سنورێ پردێ و ل نێزیک گوندێ قایەباشی، هێرش کرە سەر دوو سەنگەرێن سەربازی یێن پێشمەرگەی و بەرهنگاربوون دناڤبەرا هیزێن پێشمەرگە و چەکدارێن داعشدا درست بوو، کو تێدا شەهید و بریندار ب رێزین پێشمەرگەیدا کەفتن.

ئەو هێرشە ژ زاردەڤێ فەرماندەیێ سەربازی یێ دەڤەرێ

دەربارەی هێرشی، نوری حەمە عەلی فەرماندەیێ میحوەرێ رۆژئاڤایی کەرکوکی پێشمەرگە ب میدیایێن سەر ب پارتی ڕاگەهاندیە، ئەو هێرش دەمژمیر ١٢ و ٣٠ خولەکێن شەڤا دەربازبووی بوو و چەکداران ب هاوەن، بیکەیسی و کلاشینکۆفێ هێرشکرە سەر پێشمەرگە، لێ ئەو هێرش هاتە تێکشکاندن و شەر ژی، ٤٥ خولەکا ڤەکێشا.

نوری حەمە عەلی فەرماندێ میحوەرێ رۆژئاڤایێ کەرکوکێ پێشمەرکە ئاماژە ب وێ یەکێ ژی کریە، ل هێرشێدا سێ پێشمەرگەشەهیدبوون و دوو پێشمەرگێن دی ژی بریندارن، هەڤدەم دەربارەی ئامارا کوشتن و بریندارێن چەکدارێن داعش بەحس ژ وێ یەکی ژی کر، "چ ئامارەکا کوشتی و برینداران ل بەردەستدا نینە و تەرمێ چ چەکدارێن داعشا نەکەفتینە بەردەست"، ئەو ژی گوتیە، "چەکدار ژی د وێ بوشایا ئەولەهیێ دا دزە کریە کو دناڤبەرا هێزێن پێشمەرگە و سوپایێ عێراقێ دا هەن."

فەرماندەیێ میحوەرێ رۆژئاڤایێ کەرکوکێ یێ پێشمەرگەی ئەوژی دیارکر، د هێرشێدا چ پێشمەرگەیەک ب ئێخسیر نە هاتیە گرتن و هێرش کریە سەر دوو سەنگەرێن پێشمەرگەی، لێ د سەنگەرەکی دا چ کەسەک نەهاتیە کوشتن و بریندار نەبوویە.

ڕاگەهاندنا وەزارەتا پێشمەرگەی

د بەرامبەردا ژی، وەزارەتا پێشمەرگە ئەو یەک بەرچاڤکر، "ل دەما رەڤینێ ژمارەیەکا زۆر هاتینە کوشتن و لەشێن وان بجهـ ماینە، ب لێبورینڤە ژی شەهید و بریندار ل رێزێن هێزێن پێشمەرگەی دا هەنە".

دەربارەی ئامارا شەهید و بریندارێن هێزێن پێشمەرگەی ژی، هێرش قادر نوچەگەهانێ ئین ئار تی ل بەغدا بەحس ژ وێ یەکی کرن تا نها چار پێشمەرگە شەهید بوون و ژمارەیەکا دی ژی برینداربوون.

هەڤدەم، وەزارەتا پێشمەرگەی یا حکومەتا هەرێمێ دەربارەی هێرشا شەڤا دەربازبووی یا داعشێ ڕاگەهاندەک بەلاڤکریە و تێدا دبێژیت، " هێزا پێشمەرگەیێ کوردستانێ ب توندی بەرسڤا هێرشا تیرورستێن داعش دا و تێکشاندیە".

هەر دەربارەی شەڕێ پێشمەرگەی و داعشێ ل سنورێ پردێ، دژەتیرۆرا هەریما کوردستانێ د ڕاگەهاندنەکێ دا بەلاڤکریە و دبێژیت، پێشمەرگە شیاینە "هێرشا تیرۆریستان تێکبشکێنن و نها رەوش لبن کۆنترۆلا هێزێن پێشمەرگەی دایە"، وەزارەتا پێشمەرگەی ژی دبێژیت، داعش "هژمارەکا زۆر هاتینە کوشتن".

چ تشتێ دی روویدا؟

ئومێد محەمەد نووچەگەهانێ ئێن ئاڕ تی ل بەغدا، ئەشکەراکر، کو شەڤا دەربازبووی زێدەباری هێرشا داعشێ بۆ سەر هێزێن پێشمەرگەی ل سنورێ پردێ، گرووپێن چەکداریێن داعشێ ژ سێ جهێن جۆدا هێرش کریە سەر هێزێن حکومەتا فیدڕال و پێشمەرگەی.

نووچەگەهانێ ئێن ئاڕ تی ل بەغدا بەحسا وێیەکێ کر، شەڤا دەربازبووی گرووپێن چەکدار یێن داعشێ  ل سنورێ قەزا دوبز هێرش کرە سەر هێزێن پێشمەرگەی، و ل سنورێ مەتاڕ هێرش کریە سەر فەوجا سێ یا ئارتێشا عێراقێ، هەروەسا ل سنورێ ناحیا ریازی ل رۆژئاڤایێ کەرکوکێ هێرش کریە سەر هێزێن پۆلیسێن فیدڕالی، گوت ژی، "کو تەڤایا هێرشێن داعشێ هاتینە تێکشکاندن".

چارەسەری چیە؟

نێچیرڤان بارزانی، سەرۆکێ هەرێما کوردستانێ د پەیامەکێدا کو دەربارەی هێرشێن داعشێ بۆ سەر هێزێن پێشمەرگەی بەلاڤکریە، داخازێ ژ حکومەتا فیدرالی و هەڤپەیمانێن ناڤدەولەتی یێن دژی داعشێ دکەت هێزەکا هەڤبەش ل دەڤەرێن ئاریشە لسەر بهێتە پێکئینان ب ئارمانجا بەرهنگاربوونا داعشێ د دەڤەرێ دا.

مە چەندین جارا حکومەتا فیدرالی یا عێراقێ و هەفپەیمانێن ناڤدەولەتی دژی داعش ژ مەترسیا بهێزبوونا داعش و مفا وەرگرتن ژ بوشایا ئەولەهیێ  یا نافچەیێن کێشە ل سەر ئاگەهدارکرینە، هێرشا شەڤا دەربازبووی یا داعش ل وی میحوەرێ پێشمەرگەی دا هەڤدەم بوو دگەل چەند هێرشێن دی یێن داعش دا.

سەدەما هێرشان

شارەزایێن ئەولەهیێ، هێرشێن دەم بدەم یێن چەکدارێن داعشێ بۆ سەر بنگەهـ و بارگەهێن سەربازیێن هێزێن پێشمەرگەی وحکومەتا عێراقێ، بۆ ڤالاهیا ئەولەهی د وان دەڤەرێن دناڤبەرا هەرێمی و بەغدا و لهەڤهاتنا هەرێمی و بەغدا د هندەک پرساندا ب تایبەت پرس و دۆسییا ئاسایشێ و ئەولەهیێ؛ ڤەدگەریت.

ئەڤە ژی ددەمەکیدایە، دناڤ بەشەک ژ دەڤەرێن ئاریشە لسەر ژبەر نەبوونا هەماهەنگیێ دناڤبەرا هێزێن ئەولەهی و هەبوونا فرە هێزیێ د دەڤەرێ دا، بوویە ئەگەر چەکدارێن داعشێ چالاکی و ڤەلڤینێن خۆ زێدەتر بکەن و وان ڤالاهیان ب کاربئینن و شەڤانە هێرش بکەنە سەر گوند و باژارۆکێن سنوری و د پرانیا هێرشان دا وەلاتی بووینە قوربانی.