سەرنووچە:

جارەکا دی؛ شێروان شێروانی بۆ ڤەکولینێ برنە دادگەهێ

پارێزەرێ شێروان شێروانی: ئەز نەیێ ئاگەهدارم
فۆتۆ: 
2021-02-28

367 جار خوێندراوەتەوە

ئەڤرۆ شیروان شێروانی رۆژنامەڤانێ دەستەسەرکری، هاتیە ڤەگوهاستن بۆ بنگەهێ پولیسان ل باژارێ هەولێرێ بۆ وەرگرتنا دانپێدانان دەربارەی تەئشیرێ ب ئاسایشێ و پارێزەرێ وی ژی دبێژیت، "ئەز نەهاتمە ئاگەهدارکرن".

بەشدار حەسەن پارێزەرێ شێروان شێروانی ڕاگەهاند، ئەڤرۆ شیروان ب سەدەما تەئشیرکرنی ب ئاسایشێ و ل دیف سکالایا ئاسایشا هەولێرێ بۆ بنگەهێ پۆلیسێن خانەقایێ ل وی باژاری ڤەگوهاستنە، بۆ وێیەکێ دانپێدانان لێ وەربگرن و پاشان رووبروویێ دادگەهێ کرنە.

هەڤدەم گوتیە ژی، ئەو وەکی پارێزەرێ شێروان شێروانی لسەر ڤی بابەتی نەهاتینە ئاگەهدارکرن، و رێ ب وان نەهاتیە شێروانی ببین.

ئەڤە ددەمەکی دا یە کو ل ٢٢ی جوتمەها ٢٠٢٠ێ ل دەوروبەرێن دەمژمێر ٨:٢٠ خولەکێن سپێدێ هێزەکا ئەمنی چوویە سەر مالا چەندین چالاکڤان و رۆژنامەڤانان ل سنورێ پارێزگەها دهۆک و هەولیرێ و دەستەسەرکرن.

و ل ١٦ێ ڤێ مەهێ دادگەها هەولێرێ لگۆرەی مادێ هەژمارە ٢١ێ یێ سالا ٢٠٠٣ێ سزایێ ٦ سالیێن زیندانکرنێ بۆ ٦ ژ رۆژنامەڤان و چالاکڤانا دەرخست.ئەوژی پێکدهێن ژ (شڤان بەرۆشکی، شێروان شێروانی، گوهدار زێباری، هاریوان عیسا، ئەیاز کەرەم).

هەروەسا ئەوێ یەکێ ژی نەرازیبوون و کارڤەدانێن ڕایا گشتی و بەشەک ژ پەڕلەمانتار و ئالیێن سیاسی ل دیف خۆ ئینا و ب بریارەکا نەدادپەروەرانە دزانن.

هەر د وی بیاڤیدا، نێچیرڤان بارزانی سەرۆکێ هەرێما کوردستانێ ڕاگەهاندبوو، بڕیارا دادگەهێ بۆ سزادانا ڕاگرتیێن بادینان داوی بڕیار نینە، گوتژی، ''چ کەس و ئالیەکێ مافێ دەستێوەردانێ د کاروبارێن دادگەهێ دا نینە.''

رۆژا ١٩ێ ڤێ مەهێ ژی، بالیوزخانا ئەمریکا ل بەغدا ڕاگەهاند، ب هویربینی دێ چاڤدێریا دەستەسەرکرن و پاشان دادگەهکرنا ڤێ داویێ یا رۆژنامەڤان و چالاکڤانان کری. ڕاگەهاند ژی، بەریا نها ژی دەربارەی ئازادیا رادەربرینێ گوتوبێژ دگەل حکومەتا هەرێما کوردستانێ کرییە و ل داهاتیدا ژی دێکەن.

ل پشتی پەیاما بالیوزخانا ئەمریکا ل بەغدا، مەسرور بارزانی سەرۆکێ حکومەتا هەرێما کوردستانێ ڕاگەهاند، داخازێ ژ هەمی ئالیەکێ دکەت کو ؛؛رێزێ'' ل سیستەمێ دادوەریێ هەرێما کوردستانێ بگرن.

ژ ئالیەکێ دی، کەسوکارێن سزادایێن بادینان ل پەیامەکێدا بو ڕایا گشتی بەحس ژ وێ یەکێ کر، دەستهەلات ب نە ڕاستەوخو و لژێر ئەشکەنجێ دا، گەفا بەلاڤکرنا ڤیدیویێن دانپێدانا ب زۆری یا کەسێن گرتی دکەت، گوتژی، وی کارێ نە ئەخلاقی رەتدکەن و ب وێ ژی، ئەو و خەلکێ هەرێما کوردستانێ زێدەتر تۆرە دکەن.

دێ هیتە نوکرن...

و.ح