سەرنووچە:

٣٥ سال بسەر وەغەرکرنا هونەرمەند ئەیاز زاخۆیی دا دەربازبوون

فۆتۆ: 
2021-01-20

739 جار خوێندراوەتەوە

ئەڤرۆ چارشەمبی ٢٠ی ١ی ٢٠٢١ێ ٣٥ سال ب سەر وەغەرا هونەرمەندێ نەمرێ باژارێ زاخۆ 'ئەیاز یوسف' دەرباز دبن و هێشتا دەنگ و رەنگێ وی لبەر چاڤ و گوهێ حەژێکرێن وی یە، و مالباتا وی ژی هەیا نها بەحسا وێیەکێ دکەن کو ئەوان گومان لسەر وەغەرا هونەرمەند ئەیاسی هەنە.

ناڤێ ویێ تەمام "ئەیاز یوسف محەمەد شەمام" ل سالا ١٩٦٠ ل باژارێ زاخۆ ل تاخێ جوهیان ژ دایک بوویە و د ژیێ  ٢٠ سالیێ و ل دەوروبەرێن سالێن ١٩٨٠یا دەست ب ستران گوتنێ کریە، دەرچویێ ئامادەیا پیشەی (الاعدادیە السیناعە) بویە و پشتڕا ژبەر لەشکەریا بزوور ب نەچاری چوویە د ڕێزێن لەشکەری دا و بۆ دەمەکێ د ناڤا لەشکەرێ عێراقێ دا مایە.

هونەرمەند ئیڤان لوبنان، کور خالێ ئەیاز یوسڤی د یدیارەکا تایبەتدا بۆ دجیتال میدیایا ئێن ئاڕ تی بەحسا وێیەکێ کر، کو ئەیاز یوسف هەر ژ زارۆکینیا خۆ حەژێکەرێ سترانێ بوویە و ژ مالباتەکا دەنگ خوش و دیارێن باژێرێ زاخۆ بوویە، دناڤا مالباتا وی دا چەندین دەنگێن خوش هەبووینە مینا باپیرێ وی کو ل مزگەفتا مەزن یا زاخۆ بانگ خوین و قورئان خوین و شێخ بوویە و مام و بابێ وی ژی خودان دەنگێن گەلەک خوش بووینە، و مالباتا وان د زاخۆ دا ب دەنگ خوشیا خۆ دیار و ناڤداربوون.

ئیڤانی بەحس ل کەسایەتیا هونەمەندێ نەمر ئەیازی کر وگوت،کەسەکێ رح سڤک و ب ڕەوشتبوو، دل ڤەکری و کومەلایەتی بوو، گەلەک  ب رژدی کار لسەر هونەری دکر، گەلەک جاران هەتا بەغدا چوویە و خۆ گەهاندیە ئێزگەهێ بەغدا کو وی دەمی سەمیر زاخوی ل وێرێ هاریکاریا وی کریە  ستران تومارکرنە، یەکەم جارا دەست ب هونەری کری دەوربەرێن سالێن ١٩٨٠یا بوو، ل وی دەمی بەشەکا هونەرمەندێن زاخۆ هاریکار و پشتەڤانێن وی بوینە مینا هونەرمەند ئەردەوان زاخوی، سەمیر زاخوی، د.بەدرخان سندی، عەبدلعەزیز سلێمان و محەمەد تەیب و چەندین هونەرمەندێن دی، لێ پشتەڤانێ سەرەکی بۆ ئەیاسی مامێ وی مەلاعەلی بابێ هەردوو هونەرمەندێن زاخۆ عیماد و عەدنان عەلی بوویە.

هەڤدەم، ئەیاز یوسف دژیێ خۆدا سێ کاسێت تومارکرنە و خودانێ چەندین سترانێن نەمرە کو هەیا نهاژی دل و چاڤێن حەژێکەرێن وی تژی دکەن، مینا سترانا (من دیت جارا عەولی، گەر نێچیرڤان ژ نێچیرێ برەڤن، زەریێ پارزینک هەلگرت چوو، ئای لێ لێ، نەوروز هات ب گولو ریحان.. و چەندین سترانێن دی) کو هەیا نها یەک ژ سترانێن هەرە دیارێن ئەیاس یوسڤی، سترانا "من دیت جارا عەولی" کو هونەرمەند بشار زاخوی دابووی ل رونشتنێن هونەری و بەرنامە و دناڤا هونەرمەندا هەیا نها ژی دهێنە گوتن.

دەربارەی چاوانیا وەغەرکرنا ئەیاز یوسڤی ئیڤان لوبنان بۆ ئێن ئاڕ تی گوت، ل سەردەمێ رژێما بەعس عێراقێ رۆژەک هەبوو دگوتنێ  (الیوم تبرع الدەم) رۆژا خوین بەخشینێ ل وی دەمی هونەرمەند ئەیاز یوسڤی ژی خواست خوینێ بدە، رۆژێن پشتی هنگی هێدی نیشانێن نەخوشیێ ل ئەیاسی دەرکەتن، ل دەستپێکێ هەردوو پیێن وی رەشبوون وەکی نەخوشیا شێرپەنجێ، پاشی گەهشتە هەمی لەشێ وی، نوژداران گوتیێ ئەگەر هەردوو پیێن تە ژێڤەکەین دێ مینی ساخ و نامری، لێ ئەو رازینەبوو، و گوت مرن بۆ من خوشترە ژ وێیەکێ من پێ نەبن، و هوسا ژیانا خۆ ژ دەستدا و ل گورستانا زاخۆ هاتە ڤەشارتن.

گوت ژی، پشتی ئەردەوانی کو هونەرمەندەکێ نەمرێ باژێرێ زاخۆ بوو، زانی ئەیازی وەغەرکریە لسەر قەبران هوزانا چوخێ من هریا بەرانا گوت و پاشان د ستران گوتنێ دا بەرزەبوو پشتی دەمەکێ کێم ئێدی ئەردەوان ژی بو یەکجاری بەرزەبوو، هەیا نها چ ژێ ناهێتە زانین.

د دەمەکێدا ئەیاز یوسف پشتی نێزیکی شەش سالان ژ ستران گوتنێ و د ژیێ ٢٦ سالیێ دا ل رۆژا ٢٠/١/١٩٨٦ ل باژارێ میسل وەغەراداویێ کر و ل رۆژا٢١ی هەمان مەهـ  تەرمێ وی بۆ جهێ ژ دایکبوونا وی هاتە ڤەگەراندن و ل گورستانا باژارێ زاخۆ هاتە ڤەشارتن.

ل داویێ هونەرمەندی ئیڤان گوت ژی، جهێ داخێ یە هەیا نها و پشتی ٣٥ هەیا ٤٠ سالان مە نەشیایە هونەرێ وان هونەرمەندێن مەزن مینا ئەیاز و ئەردوان و محەمەد عارفێ جزیری و تەحسین تاها و محەمەد تەیب و سەمیر زاخوی گەلەکێن دی کو ل سەر ئاستەکێ بلند ستران گوتینە  بکەینە پشتەڤانەک بوو بەرەڤ پێشڤەبرنا سترانا کوردی، مە زێدەتر سترانا بیانی ئینایە دناڤا هونەرێ کوردی دا، مەرەم ژی بۆ هندەک لایک و فولویانە. پێتڤی یە سازیێن پەیوەندیدار خۆ ل هونەری بکەنە خۆدان و رێکێ نەدەن کو ئێدی هونەری ژ رێکا ویا پیروز بەرەڤ ئامانجیێن تایبەت و نەجوانکرنا هونەرێ کوردی و فلکلورا نەتەوەی ببەن.

Related image

Related image