قەلەمفرۆشى د تەجلییا خۆ دا ل سۆشیال میدیا کوردی

120 جار خوێندراوەتەوە

د سالێن نۆتان دا گۆتنەکا (ئۆنگ سان سۆچی) سیاسەتمەدارا بۆرما – وى دەمى بەرهەنگارا دەستهەلاتا لەشكەری یا دكتاتۆر بوو - من خواند دگۆت، "دل ئێشترین تشت ل دەڤ من ئەوە، دەمێ هندەک دهێن ڕەخنێ ل چالاکیێن جەریئانەیێن دژى ستەمێ دگرن و پشتا ستەمکاران دگرن و وەکی کەسێن شارەزا و بەرژەوەندیناس خۆ دنیاسن"، دبینم ئەوا وێ خانمێ خوەیاکرى جۆرەکێ قەلەمفرۆشیێ یە!

ئەگەر تو ب هزرین مێزە ل ڤى زاڕاڤێ (قەلەمفرۆش-الأقلام المأجورة) بکەى دێ بینى ڕیچالێن خۆ د کویراتییا دیرۆکا پەیوەندییا ڕەوشەنبیرى ب دەستهەلاتێ ڤە هەیە، هەر د کەڤن دا زۆر کەسێن خودان هزر و زانین و خامە هەبوون وژدان و شەڕەفا ڕۆناکبیریێ ل سیكا مەلاقیێ بەر بازاڕ کرینە د وهزر و شیانێن خوەیێن بیركرنێ كرینە د خزمەتا ئمپراتۆر و شاهـ و خەلیفە و سولتانان دا و خولامینییا ئەجیندایێن وان یێن سیاسی دا، جاران ژى د خزمەتا داگیرکەرا و و دەستهەلاتداریا وان دا، مخابن نمۆنە ژى هند پڕن ناهێنە هەژمارتن گۆهێ خۆ بدەنە ڤى هۆزانڤانێ خوێڕی (محمد بن هانئ الأندلسي) چ دبێژتە خەلیفەیێ فاتمى (المعز):

"هەرچى تە حەزکری ئەوە، نەک هەرچی قەدەرێ ڤیایـى

ئەڤجـا تو حوکمى بدە، چونـکى تۆ مەزنە خـودایى"

جارێ دا خوە د سەر هەبوونا ڤێ دیاردێ د ڕاگەهاندن و ڕۆژنامەیا کلاسیکیدا پاڤێژن و بهێن بەرێ خۆ بدینە قەلەمفرۆشێن کوردێن ڤى زەمانى چەوان جهێن خوە د ڕاگەهاندنا نوی (سوشیاڵ میدیایا) کوردیدا خوەشکرینە، دا زۆر درێژ نەکین، دێ چەند نمۆنەیەکێن کێم و کورت بێژین:

- دێ بینى قەلەمفرۆش هەمبەر ستەما جڤاکى و وێ زولما ل گشت ملەتى دهێتە کرن بێ دەنگییا سەهم هەلبژارتینە، جارەکێ نابینى نەفرەت ل دەستهەڵاتدارا گەندەڵ کرینە.

- دێ بینى زۆ دەمان کار ژبۆ (مژویلکرنا – ئیلهائا) جەماوەرى ب هندەک بابەتان کرینە.

- ڕویێ خیانەتکرنا ئەمانەتا حوکمداریێ و ڕویێن پیسێن وان زاڵمان پۆڵش و مکیاج دکن یێن ب گەندەڵییا خوە بووینە ئەگەرێن ڕاستەڕاست و ڕاستەقینە ژبۆ ڕاچاندنا حوکمێ "قانۆنا ساکسۆنى" و فاکتەر ژبۆ بەڵاڤکرنا قەیرانا ئابۆرى و هەمى قەیرانێن دیترێن ب ژیارا خەلکێڤە گرێداى، ئێک ژ وان دزینا مۆچەیێن فەرمانبەرانە و چەپکرنا دەهان ملیارێن دۆلارانە ب ڕێیا پڕکرنا لیستێن مۆچەخۆڕان ب سەدەهان هزار ناڤێن خەیالى و وەهمى و بندیواران.

- هەوڵ ددن ڕایا گشتى ژ پڕسێن مەزن ڤەگوهێزن و ببەن بەرەڤ پڕسێن دیترێن زۆر جاران هەبوونا خوە هەر ئێک جار نەهەى، ئەو پڕسێن تەنها د وان پەیڤێن درەوێن خامەفرۆشان خوەبخوە نڤێسایین هەیین.

- کرێتکرنا هەمى دەنگ و ڕوى و ڕەنگێن بەرهەنگارێن گەندەڵیێ و خرابکارییا سیاسى ژ دویرترین گەڤانێ ڕاستڕەویێ هەتا بگەهت دویرترین گەڤانێ چەپڕەویێ، هەر نەچوونەکا خەلکێ بەرهەنگار د ناڤ لڤین و چالاکییەکا دەستهەڵاتدارێن زاڵمدا، ئەو دەرکەفتن ژ ڕێزا نیشتمانى و خیانەتا ل کوردینیێ بەرچاڤ دکن، لێ د ڕاستییا خوەدا مینا دەرۆنناسى دبێژتە مە: "قەبحەتکەر هەوڵ ددت ب وێ قەباحەتا وى کرى غەیرى خوە توهمەتبار دکت، چونکى خەلکێ ل سەر خوە قیاس دکن"!

- ئەڤە هەمى و سەربارکێ خیانەتا خامەفرۆشیێ ئەوە دهێنە کوردینیێ دفرۆشنە خەلکێ و هەوڵ ددن شەرما خیانەتا قەلەمفرۆشی و نۆکەرییا خوە ژ بۆ ستەمکاران ب کراسێن پیرۆزێن نەتەوەیی و نیشتمانى ڕادپێچن و ڤەدشێرن، لێ ب خۆدێ بۆ هەر خودان عەقل و چاڤەکى ناهێنە نخامتن!