ئەوقاف و بڕینا دەست و پێن ئاینی !

3112 جار خوێندراوەتەوە

د دیروکا ئیسلامێ هەمیێ دا نەبوویە، کو ڕوژەکێ ژ ڕوژان، دەرگەهێن مزگەفتا پشتی نڤێژێ بهێنە داخستن، چونکه مزگەفت مالا هەمی موسلمان و نەموسلمانەکێ یە، مالا ڕێڤینگ و ڕێبار و بیانی و خویانی یا یە، کەسەک ژ مالا خوە دویر بیت، ل سەفەرێ بیت، یان بێ مال و حال بمینیت و هتد...، دشێت ل مزگەفتێ بخوت و ڤەخوت و بنڤیت، وەکی مەسکەنەکێ دەمکی بکاربینت، زێدەباری ئەنجامدانا پەرستنێ، لەوا دبێژن مزگەفتێ مالا خودای ، ئانکو مالا هەمی مروڤایە.

لێ مەدیت کو نه ژمێژەیە، ب ڕێکا هندەك بڕیارێن سەقەت و دژە دین!، دەرگەهێ مزگەفتا هاتە گرتن.

ب بەهانەیا ئێکگرتو و کومبینێن حزبی و تیرور و بکارئینانا مزگەفتێ وەکو بنگەهێن حزبی و هتد... ژ ڤان بەهانەیێن بێ بها ! و درەو.

پاشی ل ئاستێ گرتنا دەرگەهێ مزگەفتێ نەڕاوەستیان و دەست دان بەلاڤکرنا تومەت و لادان و گرتن و ئەشکەنجەدان و ئیهانەکرنا مەلا و زانایێن ئاینی، و هەتا نوکە ژی بەردەوامە و ڕوژ بۆ ڕوژێ خرابترە.

ل لایەکێ دی ژی بێ بها کرنا گوتارا ئەینیێ و دەستنیشانکرن و نڤێسینا گوتارێ ژ لایێ ئەوقافێ ڤە!

ژ بوو، مەلا و گوتار بێژا و نەچار کرنا وان ژ بۆ گوتنا گوتارێن ئەوقافێ .

ل ڤێرێ ژی نەڕاوەستیان و دەست دان ب لادانا گوتاربێژێن ژ خودێ تڕس و ڕاستگو ، و گهوڕینا وان گوتاربێژا ب هندەک بناڤ گوتاربێژێن خوە فروش و دین فروش و چەواشەکار و کوێلە و نەڕاستگو د ڕاستا خودای و خەلکێ دا. ئەڤە هەمی ژ لایێ دەستهەلاتێ ڤە هاتە ئەنجام دان، بتنێ دا کو بشێن بەرێ خەلکێ، ژ مزگەفت و ئاین و خودا ناسی و خوە ناسیێ! بدەن پاش، و جیلەکێ پەروەردە بکەن وەکی وان دڤێت.

کیژان جیل ؟

جیلەکێ چەوا ؟

جیلەکێ ڕەوشەنبیر یان پیچ؟

بەرسڤ : جیلێ قومار و مەی و پیچاتی و دەرمان کێش و گێژ و بکێر نەهاتی. واقعێ ئیرو یێ هەرێمێ دەربڕینێ ژ ڤێ ڕاستیێ دکەت، کو ب دەهان و سەدان تەنێن ماددێن بێهوشکەر دهێنە دەربازکرن بۆ ناڤا خاکا کوردستانێ و ب دەهان و سەدان ژ گەنج و پیر و کچ و کور و ژن و زەلاما فێری ڤی ماددەیێ کوژەک بووینە و مەسەلە گەهشتیە ئاستەکێ، کو ئێدی ئەڤ کەسێن ئالودە ب ڤی ماددەی، ژ بن کونتڕولێ دەرکەفتینە و کەس نینە خوە لێ بکەت خودان، بەڕوڤاژی ل کولان و جادەیان دهێنە بریندارکرن و کوشتن .

کی ئەگەرێ سەرەکیێ ڤێ کارەساتا مەزنە؟

بەرسڤ: بلا بۆ هەوە بییت..

داڤەگەڕین سەر بابەتێ خوە: ب لادانا گوتاربێژێن حەق بێژ، ژی نەڕاوەستیان، و نها بڕیارە ل پارێزگەها دهوکێ بتنێ ئێک بانگ! بهێتە دان و ئەو ژی بهێتە ئەڵکترونی کرن!، ئەڤ چەندا دهێتە کرن دبێژنێ، ( ترویض! نەك تسیس!) ئانکو فێرکرن و پەروەردەکرن و کەهی کرن و سەردابرن و قانعکرنا مللەتی ب بەهانەیێن جورا و جور، ترویض د بنەما دا ژ بۆ گیانەوەرا دهێتە بکارئینان، و نمونە ژی دەمێ هەسپ دهێنە پەروەردەکرن، ژ بۆ و سواربوون و غاردانێ، و دهەمان دەم دا ئەڤ هەسپە دهێنە لغافکرن!، ئانکو تەمام تەسلیمی خودانێ خوە دبن.

لێ تسیس ژ بۆ مروڤا دهێتە بکارئینان کو ئەو ژی پێک دهێت ژ چەوانیا بڕێڤەبرن و ئاڕاستەکرنا وان، لەوا من گوت ترویض نەک تسیس!، چونکە ئەڤ دەستهەلاتە مە فێر دکن و مە دهاژون و ئاراستە دکن وەکی وان دڤێت، و دهەمان دەم دا مە لغاف ژی دکن! ئانکو سەرەدەریا گیانەوەرا دگەل مە دکەن.

یا مەزنتر و ئەز دویر نابینم ئەوە، کو ل نێزیک نەبتنێ بانگ بهێت چارچوڤە کرن و ئەلکترونی کرن، بەلکو هەتا وی ڕادەی ژی کو بێژن خەلکێ ئێدی هوین دێ ل مالێن خوە ب ڕێکا کەنالەکێ یان ڕادیویێ یان شاشەکێ بشێویەکێ زیندی! ل گەل مەلای نڤێژا خوە یا فەر یان نڤێژنا ئەینیێ ب شێوەکێ ئەڵکترونی کەن.

ئانکو مەلا ل مزگەفتێ و خەلک مالێن خوە و پێکڤە ب ڕێکا لایڤێ نڤێژێ بکن! ، خوینەرێ هێژا دزانم ئەڤ چەندە جهێ کەنیێ یە ب تە مانە؟، لێ تە پشتڕاست دکم ئەڤ چەندە دویر نینە ژ ڤێ دەستهەلاتێ.

پشتی هنگێ ژی دێ بتەمامی مزگەفت و گوتارا ئەینیێ و ئاینی ژ ژیانا موسڵمانا بڕن، ب ڕێکێن شەیتانیێن جودا جودا، ئەم ژبیر نەکن کو هەلبەت ئەڤ بابەتێ مە باحسکری، ژ بۆ هەمی وەلاتێن موسلمانا دروستە نەبتنێ ژ بۆ کوردستانێ. چونکە هەمی دەستهەلاتێن زوردار، دئامادەنە هەمی ڕێک و ڕێکارەکێ بگرنە بەر، بتنێ ژ بۆ سەقەتکرن و گێژ کرن و کویلە کرنا مللەتێن خوە، ئەگەر ئەو ڕێک چەند نەڕەوا و نەدروست ژی بن.