‎زێدەتری ٥٠٪‏ یا خەلکێ هەرێما کوردستانێ دڤێن؛ ‎هەرێم بزڤریتە بسەر عێراقێ ڤە!

9660 جار خوێندراوەتەوە

‎رۆژنامەیا(الصباح) یا زمان حالێ فەرمیێ وەلاتێ عێراقێ دیارکر، ‎راپرسیەک ژلایێ رێکخراوەکا نێزیک ژ "پارتی"ڤە ‎لسەر خەلکێ ھەرێما کوردستانێ ھاتیە ئەنجاندان، ‎کو تێدا دیار دبیت پتریا خەلکێ کوردستانێ ژ حکومرانی و ئیدارەدانا بێسەروبەرا (پارتی و یەکێتی) نەدرازینە و دڤێن هەرێما کوردستانێ ڤەگەریتە بسەر عێراقێ ڤە.

‎ئەنجامێن ڤێ راپرسیێ د دەمەکی دانە، کو بەری نوکە چەندین جاران رۆژئاڤا لسەر زارێ نوینەرا نەتەوەیێن هەڤگرتی (جێنین پلاسخاتێ) زەنگێن مەترسیێ لسەر قەوارەیێ ھەرێما کوردستانێ و ژناڤچوونا وێ ئاراستەیی گوھێن دەستھەلاتدارێن پارتی و یەکێتی کرینە ب مەرما ھندێ پێداچوونەکێ د رەوشا کوردستانێ و حکومرانیا خویا خرابدا بکەن.

‎دنھادا پێگەھێ هەرێما کوردستانێ گەلەک لاواز بوویە ژ ئەگەرێ حکومرانیا خرابا "پارتی و یەکێتی"و مەترسیەکا جدی لسەر خەلک و قەوارەیێ ھەرێما کوردستانێ درووست بوویە و شەرعیەتا سازیێن هەرێمێ کەفتیە ژێر پسیارێ لسەر ئاستێ ناڤخۆ و نیڤدەولەتی!.

‎ئەگەرێن سەرەکیێن مەترسیێ لسەر خەلک و قەوارەیێ ھەرێما کوردستانێ و خالێن لاوازێن ھەرێمێ ڤەدگەرن بۆ:

١- نەبوونا ئازادیێ و زیندانکرنا دەنگێن ئازاد.

‎٢- پاشئێخستنا پرۆسەیا ھەلبژارتنێن پەرلەمانی و ئەنجام نەدانا ھەلبژارتنێن جڤاتێن پارێزگەھان د دەمێ وان دا.

‎٣- زێدەبوونا گەندەلیێ و باجێ لسەر وەلاتیان.

‎٤- دیار نەمانا داھاتێن گشتی و پەتڕۆلێ و زێدەبوونا دیاردا قەچاغیێ.

‎٥- نەبوونا خزمەتگوزاریان ب گشتی (کارەب – گاز- غاز ...هتد).

‎٦- رێژەیا زۆرا بێکاریێ و نە دامەزراندنا گەنج و دەرچوویێن زانکۆ و پەیمانگەھان.

‎٧- سیناریوویێن بێ بنەما و ناکوکیێن ئێک لدیڤ ئێکێن پارتی و یەکێتی.

‎ئەڤ خالێن لسەری دیار و چەندین خالێن دی بووینە خالێن رەش بناڤ چاڤێن حکومرانیا سەقەتا پارتی و یەکێتیێ ڤە، ‎ژبەر ھندێ پارتی و یەکێتی ھەر رۆژ و سیناریویەکێ درووستدکەن، خۆ ژ ھەلبژارتنان ڤەدزن و دەست ب ناکوکیان دکەن و بێکو چ جاران ‎ل چارەسەریێن راستەقینە بگەڕن کو پێ خزمەتا خەلکێ کوردستانێ بکەن.

هەروەسا، ‎بەردەوام پارتی و یەکێتی د جڤینێن خۆدا سیاسەتەکا عینادی ل هەمبەر ئێک و دوو بکار دئینن و بزاڤا خو فەرزکرنێ لسەر ئێک و دوو دکەن، ‎ھەر وەسان بھەمان نەفەس و سەر رەقی سیاسەتێ دگەل حکومەتا عێراقێ دکەن بۆ پرسا رادەستکرنا داھاتێن سیادی و پەتڕۆلێ، ‎بێ کو بەرژەندیا خەلکێ کوردستانێ لبەر چاڤ وەرگرن بەلکو بەروڤاژی ب پشتگوڤە ھاڤێتینە و چاڤێ وان ل دەستکەفتێن حزبی و تایبەتن.

‎ژبەر ھندێ بدیتنا من ئەڤرۆ مەزنترین مەترسی لسەر خەلک و قەوارەیێ ھەرێما کوردستانێ، ‎بەردەوامیدانا دەستھەلاتا سەقەتا پارتی و یەکێتی یە لسەر ھەرێما کوردستانێ و هەرێم گەھاندینە سەر لێڤا گوڕی و کرینە نێچیرەکا بسانەھی بۆ ھەر دوژمنەکی.