PM:12:21:04/11/2022
3316 جار خوێندراوەتەوە
+
-
نووچەگەهانێ ئێن ئاڕ تی ڕاگەهاند، ناڤێ ٥١
کەسان د لیستێ دایە بۆ بوونا وان وەکی ئەندامێن سەرکرداتیا پارتی لێ ژ ئالیێ
مەسعود بارزانی ڤە ئەو ژمارەیە بۆ ٦١ کەسان هاتیە زێدەکرن. دبێژیت ژی، "پتریا
بەربژێرێن جڤاتا سەرکردایەتیێ نێزیکی مەسرور بارزانی نە".
بڕیار نێروەی، نووچەگەهانێ ئێن ئاڕ تی ل
دهۆکێ ڕاگەهاند، سپیدا ئەڤرۆ دووەم رۆژا کۆنگرەیێ پارتی دیموکراتی کوردستان ل وی
باژێری دەستپێکریە و دهێتە پێشبینیکرن پشتی لژنەیێن بەرهەڤیکار راپۆرتێن خۆ پێشکێش
بکەن جڤاتا سەرکرداتیا وێ پارتێ ب هێتە هەلبژارتن.
گوتژی، ژمارا ئەندامێن جڤاتا سەرکردایەتیێ ل
دیڤ پەیرەوی د لیستێ دا ٥١ کەس هەبووینە لێ ژ ئالیێ مەسعود بارزانی ڤە بۆ ٦١ کەسان
کو ناڤێن یەدەگن هاتینە زێدەکرن و ئەگەر ئاریشە و کێشمەکێش زێدەبن دبیت ئەو
ژمارەیە بهێتە زێدەکرن.
ئاماژە ب وێیەکێ ژیکر، پتریا بەربژێرێن
سەرکردایەتیا پارتی دیموکراتی کوردستان ئەو کەسەنە کو بەریا نها دگەل دەزگەهێن
ئەولەکاریێ و بارەگایێ بارزانی کارکرینە و بووینە جهێ باوەریا وان، بڤێ ژی ب
ئاویەکێ گشتی و بەربژێرێن بادینان ژی بتایبەتی هەمی ئەو کەسێن نێزیکی مەسرور
بارزانی نە.
دیارژیکر، دەنگدان ب رێکا ئەلیکترۆنی دبیت و
بۆ ڤێ مەرەمی ژی برنا مۆبایل و دەمژمێرێن زیرەک بۆ ناڤ هۆلێ قەدەغەکرینە.
بەحسا وێیەکێ ژیکر، پارتی ڤێ جارێ گرنگیەکا
زێدە ب پارێزگەها دهۆکێ و دەڤەرا بادینان ب گشتی دایە ژبەرکو د هەلبژارتنێن
دەربازبووی دا پارتی تووشی حێبەتیێ ببوو کو خەلکی دەنگ ب وان نەدا هەر ژبەر هندێ
ئەو دخازن ل هەر دەڤەرەکێ ئەندامەکێ سەرکرداتیێ بهەلبژێرن.
ئەڤە د دەمەکێ دایە، دوهی ٣ێ ١١ێ ٢٠٢٢ پارتی
دیموکراتی کوردستان ١٤مین کۆنگرەیێ خۆ بۆ جارا ئێکێ ل باژێرێ دهۆکێ دناڤ هۆلا
کۆنفڕانسان یا زانکۆیا دهۆک دا گرێدا و بڕیارە بۆ دەمێ سێ رۆژان بەردەوام بیت.
هەڤدەم، هەر دوهی مەسعود بارزانی بۆ جارا شەشێ وەکی
سەرۆکێ پارتی هاتە هەلبژارتن و نێچیرڤان بارزانی وەکی جێگرێ ئێکێ و مەسرور بارزانی
وەکی جێگرێن دووێ هاتن هەلبژارتن.