نوینەرێ حکومەتا هەرێمێ ل بەغدا ڕاگەهاند، ئەو پارەیێ کو بڕیارە ژ بەغدا بهێت، د چەند رۆژێن داهاتی دا دێ گەهیتە هەرێمێ.

هەرچەندە بڕیاربوو ئەڤرۆ چارشەمبێ، ٢٠٠ ملیار دینار ژ بەغدا بگەهنە هەریما کوردستانێ، لێ تا نها ئەو کوژمێ پارەی نە ئێخستیە لسەر هەژمارا بەنکا حکومەتا هەرێمێ.

دەربارەی وێیەکێ ئێن ئاڕ تی پەیوەندی کر ب فارس عیسای نوینەرێ حکومەتا هەرێمێ ل بەغدا و وی ژی سەدەمێ نە گەهشتنا ٢٠٠ ملیاران د ئەڤرۆ دا بۆ روتینا کارگێری ڤەگەراند.

د دەمێ دەربازبووی دا حکومەتا هەرێمێ و حکومەتا عێراقێ لهەڤهاتن ب وێیەکێ ٢٠٠ دینار ژ ئالیێ بەغدا ڤە وەک سلفەک بۆ هەرێمێ بهێتە هنارتن.

ئەڤرۆ ژی د کونفرانسەکێ روژنامەڤانی دا وەزیرێ ناڤخویێ هەرێمێ ڕاگەهاند، ئەو وەکی مەهێن دی چاڤەرێی بڕیارا جڤاتا وەزیرانبوون و پشتی نیڤرۆ یا دهی بڕیار گەهشتیە وان بۆ پارڤەکرنا مووچەی بێ لێبرین.

بەحس ل وێیەکێ ژی کر، تا نها چ کوژمەکێ پارەی کو ٢٠٠ ملیارن نە گەهشتینە سەر هەژمارا بانکا وەزارەتا دارایی یا هەرێمێ.

زەلالژی کر، ب سەدەمێ نە هنارتن و پاشخستنا پارەیێ بەغدا پروسەیا پارڤەکرنا مووچەی دێ خاڤ بیت و تا پارێ فروتنا پەترۆلێ ب تەمامی ڤەدگەریت بۆ وەزارەتا دارایی.

سەرەرای وێیەکێ ب تنێ مەها دەربازبووی حکومەتا هەرێمێ لێبرینا مووچەی نەهێلابوو، د دەمەکی دا چەند مەهەکە داهاتی پەتڕۆلێ و نە پەتڕۆلێ زێدە بوویە و بهایێ دۆلاری د بلندیێ دا جێگیرە.

لێ پشتی بڕیارا حکومەتا عێراقێ بۆ هنارتنا ٢٠٠ ملیاران و دگەل گەهشتنا وی دا پاشی حکومەتا هەرێمێ بڕیاردا ب نەهێلانا لێبرینێ و تا نها ژی سۆز نەدایە کو لێبرین بو هەمی مەهان نا مینیت و دێ لادەن ، بەلکی دبێژن لدیف داهاتی دێ هێتە پارڤەکرن.