AM:10:40:25/08/2021
832 جار خوێندراوەتەوە
+
-
یاریدەدەری سکرتێرێ گشتیێ نەتەوەیێن هەڤگرتی
بۆ کاروبارێن مرۆڤی ڕاگەهاند، ژ مەها کانونا دووێ و هەیا نها ٦٩ کەس ل کەمپا هۆل ل
باژێرێ حەسەکێ ل سوریا هاتنە کوشتن.
هنارتیێ تایبەتێ نەتەوەیێن هەڤگرتی بۆ سوریا ژی دبێژیت، ب داوی هاتنا شەری گەلەک
دوویرە.
مارتن گریفتس یاریدەدەرێ سکرتێرێ گشتیێ نەتەوەیێن
هەڤگرتی بۆ کاروبارێن مرۆڤی ڕاگەهاند، ئاریشەیا ئەولەکاریێ دناڤ کەمپا هۆلێ دا
بەردەوامە و ل مەها حوزەیران و تەمموزێ دا توندوتیژی لهەمبەر ژن و زارۆکێن کچ دا
زێدەکریە.
بەحسا وێیەکێ ژی کر، کو ژ مەها کانوونا دووێ و
هەیا نها کوشتنا ٦٩ کەسان هاتیە تۆمارکرن و بزاڤێن کوشتنا ١٢ کەسێن دی ژی
هاتیەکرن.
ژ ئالیێ خۆڤە ژی، گێر پێدەرسن هنارتیێ
تایبەتێ نەتەوەیێن هەڤگرتی بۆ سوریا، هایداریا دووبارە زێدەبوونا پێکدادان و
بۆمبەبارانێن دژوار ل باشوری رۆژئاڤایێ سوریا ب تایبەتی ل دەرعایێ و داخاز ژ
ئالیان کریە دەملدەست داویێ ب وێ توندوتیژیێ بینن.
ئاماژە ب وێیەکێ ژی کریە، هێرشێن ئەسمانی ژی
بۆ سەر باکورێ رۆژئاڤایێ سوریا زێدەکریە و گوتیە، "دیتنا بداوی هاتنا شەری
گەلەک دوورە" و ڕاگەهاند ژی، کو ژبەر ڤێ سەدەمی پێتڤی ب پێڤاژوویەکا سیاسیا
باوەرپێکری و هەماهەنگیەکا نیڤدەولەتیا بەردەوام هەیە.
کەمپا هۆلێ ل سوریایە و لبن دەستهەلاتا چەکدارێن
پەکەکێ و یەپەکێ دایە، هەڤدەم، ئەو کەمپە ٥٩ هزار کەس تێدا دژین.