PM:06:23:04/12/2021
560 جار خوێندراوەتەوە
+
-
جێگرێ سەرۆکێ هەرێمێ ڕاگەهاند، د نها دا
گرۆپێ چەکدارێن داعش شێوازێ هێرش و پەلامارێن خۆ بۆ سەر هێزێن پێشمەرگەی گوهۆرینە
و پێتڤیە "پێشمەرگە ژی شێوازێ رووبرووبونێن خۆ ب گوهۆریت".
جەعفەر مستەفا جێگرێ سەرۆکێ هەرێمێ بۆ میدیایێن
پارتی ئاماژە ب وێیەکێ کریە، شێوازێ ئەڤێ جارێ یێ هێرشا گرۆپێن چەکدارێن داعش
پارتیزانیە و ل پێناڤ کوشتن و بریندارکرنا زۆرتین کەس هێرشێ دکەن، "نەکو ل
پێناڤ گرتنا روبەرەکێ دیارکری یێ جۆگرافی".
بەحسا وێیەکێ ژی کر، "ل هەمبەر ڤی
شێوازێ نویێ هێرشکرنا داعش ئەم ل وەزارەتا پێشمەرگەی پێتڤی ب ڕاهێنان و پرچەککرن و
چێکرنا سەنگەرێن پێشمەرگەی نە، ب ئاوایەکێ ڕاهێنان پێ بهێنەکرن چاوا رووبروویێ ڤان
جۆرە شەڕان ببن ئەوێن ئەڤرۆ داعش دکەت".
جەعفەر مستەفا ڕاگەهاند ژی، "ئەو هێزێن
داعش ل پشت سوپایێ عێراقێ دزە دکەن و دهێنە دناڤ دا و هێرشی سەر هێزێن پێشمەرگە و
ئاکنجیێن دەڤەرێ دکەن و پشترە ڤەدگەرن".
گوتیە ژی، "مە پێتڤیا تەمام ب
هەماهەنگیا دگەل سوپایێ عێراقێ هەیە تا کو بشێن هێزێن هەڤبەش ل وێ ڤالاتیا
ئەولەهیێ پربکەین".
ئەڤە د دەمەکێ دایە، شەڤا پێنجشەمبیا حەفتیا دەربازبووی،
داعش هێرشکرە سەر گوندێ خدرخیجەیێ سنورێ قەرەچووغ و ١٣ پێشمەرگە شەهیدبوون.
د شەڤا ٢٧ی مەها دەربازبووی ژی، ل ناحیا کولەجۆیا
گەرمیان داعش هێرشکرە سەر سەنگەرێن پێشمەرگەی و د دەمەکێ دا هەڤکاری بۆ هێزێن پێشمەرگەی
چوبوو بۆمبەکا چاندی ب ترۆمبێلا پێشمەرگەی ڤە تەقیا و پێنج پێشمەرگە شەهیدبوون و
چارێن دی ژی برینداربوون.
ل ٢٩ی مەها دەربازبووی ژی دا، ل سنورێ کفری ژ
ئالیێ چەکدارێن داعش ڤە هێرشی سەر هێزێن پێشمەرگەی هاتەکرن و د ئەنجامدا دوو پێشمەرگەی
شەهیدبوون و سێ پێشمەرگەیێن دی ژی برینداربوون.