PM:09:19:27/03/2025
404 جار خوێندراوەتەوە
+
-
پەرلەمانتارەکا نەوەی
نوێ راگەهاند، حکومەتا رێڤەبرنا کاران دەست بسەر پارەیێ وان کارمەندان دا گرتیە یێن
کو هەوا ڤاکسین دانانا سێیێ بۆ وەلاتیان ئەنجامداین، حکومەتا رێڤەبرنا کاران ژی
بەرسڤا وێ پەرلەمانتارا نەوەی نوێ دا و دبێژیت، بەغدا چ کۆژمەکێ پارەی نەهنارتیە،
د دەمەکێدا لدویف نڤیسارەکا حکومەتا رێڤەبرنا کاران، ل هەیڤا ١٠ـیا سالا
دەربازبووی بەغدا ئەو پارەیە خەرجکریە.
ئەڤرۆ پێنچشەمبی، وەزیرە ئەحمەد، پەرلەمانتارا نەوەی نوێ
ل پەرلەمانێ عێراقێ بەحسا وێیەکێ کر، پارەیێ وان کارمەندێن کو ژلایێ وەزارەتا داراییا
عێراقێ ڤە بۆ هەرێمێ هاتیە خەرجکرن، ملیارەک و ٧٥ ملیۆن و ٩٢٦ هزار دینارە، لێ تا
نها ل هەرێمێ نەهاتیە خەرجکرن و حکومەتا رێڤەبرنا کاران دەست بسەردا گرتیە
هەڤئاوایێ مووچەیێ هەیڤا ١٢ یێ سالا دەربازبووی دڤێت وی ژی بخۆت.
د هەڤبەر ژی دا،
وەزارەتا داراییا حکومەتا رێڤەبرنا کاران بەرسڤا وێ پەرلەمانتارا نەوەی نوێ دایە و
دبێژیت، هێشتا بەغدا چ کۆژمەکێ پارەی یێ وان کارمەندان خەرج نەکریە.
ئەڤە ژی د دەمەکێدایە،
لدویف چەند نڤیسارێن حکومەتا رێڤەبرنا کاران بخۆ، ئەو پارەیە ل بەغدا هاتیە خەرجکرن
و هەیا کو وەزارەتا داراییا هەرێمێ بخۆ ئەو پارەیە رەوانەی وەزارەتا ساخلەمیێ ژی
کریە و ب حساب هاتیە دابەشکرن.
لدویف راگەهاندنەکا وەزارەتا
ساخلەمیا حکومەتا رێڤەبرنا کاران، ل هەیڤا ١٠ـیا سالا دەربازبووی ئەو پارەیە بۆ هەرێمێ
هاتیە خەرجکرن، لدویف نڤیسارەکا وەزارەتا دارایی ژی کو ئیمزایا ئاوات جەنابی
پێڤەیە، ل ٢٤ـی ١١ـی ٢٠٢٤ـێ ئەو پارەیە بۆ وەزارەتا ساخلەمیێ هاتیە هنارتن.
دیڤدا ژی و لدویف
نڤیسارەکا وەزارەتا ساخلەمیێ ل ١٨ـی ١٢ـی ٢٠٢٤ـێ کو ئیمزایا سامان بەرزنجی پێڤەیە،
ئەو پارەیە ژ بەغدا بۆ وان هاتیە هنارتن و ئەوان ژی بڕیارا خەرجکرنا وی پارەی دایە.
د دەمەکێدا لدویف نڤیسارەکا
وان بخۆ ئەو پارەیە وەرگرتیە لێ نها حکومەتا رێڤەبرنا کاران دبێژیت، پارە ژ بەغدا
وەرنەگرتیە و دابەش ژی ناکەت.
ب گوتنا وەزیرێ ساخلەمیێ
ژی، پارەیێ وێ ڤاکسین لێدانێ ئێک ملیار و ٧٥ ملیۆن و ٩٢٦ هزار دینارە، رۆژا ١٨ـی ١٢ـی سالا ٢٠٢٤ـێ
بڕیارا خەرجکرنا وی پارەی هاتیە دان، ئانکو چار رۆژن بڕیارا خەرجکرنێ هاتیە دان و تا
نها ئەو پارەیە نەهاتیە دابەشكرن.
