وەزیرێ باژێرڤانیا هەرێمێ: جهێ ئەو عەردێن ب فەرمانبەران دهێتەدان گەلەک باشن

PM:12:34:21/02/2025

576 جار خوێندراوەتەوە

+ -

وەزیرێ باژێرڤانی و گەشتوگوزارا حکومەتا رێڤەبرنا کاران راگەهاند، پرۆسەیا دابەشکرنا عەردان بسەر فەرمانبەران دا بەردەوامە، دبێژیت ژی، جهێن وان عەردان گەلەک یێ باشە و هیڤیدارن فەرمانبەر ئەرزان فرۆش نەکەن.

ئەڤرۆ ئەینی، ساسان عەونی، وەزیرێ باژێرڤانی و گەشتوگوزارا حکومەتا رێڤەبرنا کارێن هەرێمێ بۆ میدیایێن پارتی راگەهاند، پرۆسەیا دابەشکرنا عەردان بسەر فەرمانبەران دا بەردەوامە و نەهاتیە ڕاگرتن، تا نها فەرمانا دابەشکرنا 240 هزار و 111 پارچە عەردان دەرچوویە.

ئاماژە ب وێ یەکێ ژی کر، جهێن وان عەردان گەلەک باشن و هیڤیدارن فەرمانبەر عەردێن خۆ ئەرزان فرۆش نەکەن.

ئەو یەکژی بەرچاڤکر، نها ناڤێ 35 هزار فەرمانبەرێن دی بۆ وەرگرتنا پارچە عەردان بەرهەڤە و ل حەفتیا بهێت بۆ جڤاتا وەزیران دێ هێتە هنارتن.

بەحسا وێ یەکێ ژی کر، د دەمەکێ نێزیک دا ناڤێ هەمی وان فەرمانبەران دێ هێنە بەلاڤکرن کو دابەشکرنا عەردان وان ڤەدگریت، هەروەسا رێکێ نادەن چ ئاریشەیەک ببیتە بەربەست ل هەمبەر راگرتنا پرۆسەیا دابەشکرنا پارچە عەردان.

ئەڤە د دەمەکی دایە، تا نها عەرد بتنێ بسەر هژمارەکا کێم یا فەرمانبەران دا هاتیە دابەشکرن و هندەک عەردان ژی بهایێ وان ناگەهیتە تێچوویا مامەلەیا تاپۆکرنا وان ژی.