ئەڤرۆ رۆژا ئالایێ کوردستانێ یە؛ دیرۆکا دیارکرنا وێ هەلکەفتێ و رەنگێن ئالایێ کوردستانێ چەوا بوویە؟

AM:11:43:17/12/2024

260 جار خوێندراوەتەوە

+ -

ئەڤرۆ ١٧ێ کانوونا ئێکێ؛ رۆژا ئالایێ کوردستانێ یە، کو ئەو رۆژە ژدەف پەرلەمانێ کوردستانێ هاتیە دانان.

ل ١٦ێ ٤ێ سالا ٢٠٠٤ێ، پەرلەمانێ کوردستانێ رۆژا ١٧ێ ١٢ وەکی رۆژا ئالایێ کوردستانێ دیارکر.

سالانە ل ١٧ێ ١٢، ل سازیێن هەرێمێ ئالایێ کوردستانێ دهێتە هلدان و ل خاندنگەهان ژی خاندەکار چەندین چالاکیان بۆ بلند ڕاگرتنا وێ رۆژێ ئەنجامددەن.

پێشترژی پەرلەمانێ کوردستانێ ئەو یەک راگەهاندیە، "ئالایێ کوردستانێ رەمزا قەوارەیا هەرێما کوردستانێ یە و د دەستوورێ هەردەمیێ عێراقێ دا دان پێ هاتیە دان."

دیرۆکا رۆژا ئالایێ کوردستانێ:

ل ١٧ێ ١٢ێ سالا ١٩٤٥ێ زاینی، کو ب سالا کوردی دکەتە ٢٦ێ سەرماوەز یێ ٢٦٤٥، د مەراسمیەكێدا و ب بەرهەڤبوونا قازی محەمەد و چەند هەڤکارێن دی ژ پارچەیێن جودایێن كوردستانێ ئالایێ كوردستانێ ل مەهاباد ب فەرمی هاتە هلدان، ئەوئالایە ل مەیدانا چوارچرا لسەر ملێ كەریمێ نازمی ب بەرهەڤبوونا چەندین کەسان بەرەڤ ئاڤاهیەکێ مەهاباد بر و لسەر وی ئاڤاهی هلدا، کو پشتراژی ئالایێ کوردستانێ ل هەمی وان باژێر و باژێرۆکان هلدا یێن کو ژدەرڤەی دەستهەلاتا شاهێ وی دەمی یێ ئیرانێ دا بوون.

ئالایێ کوردستانێ:

دەربارەی شێوەیێ ئالایێ کوردستانێ د. قاسملۆ سکرتێرێ بەرێ یێ حزبا دیموکراتیا کوردستانێ ئیران نڤیسیە، "ئالایێ كوردستانێ سێ رەنگ بوونە، رەنگێ سۆر ل سەری، رەنگێ سپی ل ناڤەڕاستێ ‌و رەنگێ کەسک ل خارێ، هێمایێ كوردستانێ ل ناڤەڕاستا ئالایدا بوویە كو بریتی بوو ژ قەلەمەكی د ناڤبەرا دوو گولە گەنماندا، وی قەلەمی گرنگی پێدانا حزبا دیموكرات ‌و كۆمارا كوردستانێ ب فەرهەنگ ‌و زانست د نواند و گولە گەنم ژی نیشانەیا بەرهەم ‌و كار بوویە، حەتاڤ ژی ژ لایێ سەری یێ وی ئارمی هەلاتبوو كو سیمبولا ئازادیێ بوو."

پشترا ل سالا ١٩٩٩ێ پەرلەمانێ كوردستانێ یاسایەك دەرێخست دەربارەی ئالایێ كوردستانێ و شێوازێ ئالای و سەرەدەریکرن دگەلدا ب یاسایێ رێكخست، کو دناڤدا هاتبوو:

هەرێما كوردستانا عێراقێ ئالایەكێ شێوە لاكێشەیی دبیت، پانیا وی سێ یەكا درێژیا وی دبیت و بسەر سێ لاكێشەیێن ئاسۆیی یێن یەكسان ژ درێژی ‌و پانیێ دابەشكریە، ب ڤی ئاوایی:

ئێک: لاكێشەیا سەری رەنگێ وێ سۆرە، هێمایە بۆ شەهیدێن بزاڤا رزگاریخوازا كوردان.

دوو: لاكێشەیا ناڤەڕاستێ سپیە، هێمایە بۆ ئاشتی ‌و ئازادی‌ و دیموكراتی‌ و لێبورینێ كو گەلێ كوردستانێ دڤێت.

سێ: لاكێشەیا خارێ رەنگێ کەسکە، هێمایە بۆ چاندنێ و سروشت‌ و ژینگەها كوردستانێ.

چار: د ناڤەراستا لاكێشەیا سپی دا رۆژەک هەیە رەنگێ وێ زەرە، د کەڤیتە خالا هەڤدوو گرتنا رووبەرێ وێ لاكێشێ، ٢١ تیشكێن سێگۆشەیێن یەكسان ژێ دەردکەڤن، بلندیا تیشكان دگەهیتە ناڤەڕاستا هەردوو لاكێشەیێن سۆر و کەسک، حەتاڤ هێمایە بۆ بەردەوامبوونا ژیان‌ و مەعریفە و هیڤی و گەشبینیێ، ٢١ تیشك ژی هێمانە بۆ هەلکەفتا نەتەوەییا نەورۆزێ، رۆژا بەرهنگاربوون و راپەرین‌ و شۆڕش‌ و رزگاریێ دژی زولم‌ و ستەم‌ و تەپەسەرکرنێ.