PM:04:56:31/07/2024
3320 جار خوێندراوەتەوە
+
-
سەرۆک وەزیرێن ئیسرائیل
ڕاگەهاند، هەمی بەرپرسێن وەلاتی هاتینە هایدارکرن کو چ داخۆیانیەکێ دەربارەی
کوشتنا سەرۆکێ مەکتەبا سیاسیا حەماس نەدەن و وەکی حکومەتا ئیسرائیل بێ دەنگیێ هەلدبژێرن.
ئەڤرۆ چارشەمبیێ، بنیامین
ناتانیاهۆ سەرۆک وەزیرێن ئیسرائیل ڕاگەهاند، هەمی وەزیرێن حکومەتا وی و بەرپرسێن
وەلاتی هایدار کرینە دەربارەی داخۆیانی دان لسەر کوشتنا ئیسماعیل هەنیە سەرۆکێ
مەکتەبا سیاسیا حەماس.
هەڤدەم، دەیڤد مینسر
پەیڤدارێ حکومەتا ئیسرائیل رەت کر چ داخۆیانیان د وێ دەربارێ دا بدەت و بەحسا وێ
یەکێ کر، پێگیرن ب گۆتوبێژان و گڤاشتن کرن ل حەماس بۆ ئازاد کرنا ئێخسیران.
ئەویەک ژی بەرچاڤ کر،
حەماس بنپێکاری ل هەمبەر رەشنڤیسێ رێکەفتنان کریە بەند گۆهرینە و پێگری کڤانا
رێکەفتنان نەبوویە، دبێژیت ژی، "شەڕ دێ یێ بەردەوام بیت تا دگەهینە هەمی
ئارمانجێن خۆ".
هەڤدەم، کوشتنا ئیسماعیل هەنیە سەرۆکێ
مەکتەبا سیاسیا حەماس کارڤەندانێن نیڤدەولەتی لدویف خۆ هێلان، وەزیرێ بەڕەڤانیا
ئەمریکا ڕاگەهاند، پێشبینیێ ناکەن چ شەڕێن نوی ل رۆژهەلاتا ناڤەراست دروست بن.
جێگرێ وەزیرێ دەرڤە یێ روسیا ژی دبێژیت، "کوشتنا هەنیە تیرۆرەکا سیاسی یا
قەبیلنەکریە".
هەر د وێ دەربارێ دا،
میخائیل بۆگدانۆڤ، جێگرێ وەزیرێ دەرڤە یێ روسیا ئاماژە ب وێ یەکێ کر، کوشتنا هەنیە
تیرۆرا سیاسی یە و رەنگە ببیتە سەدەمێ زێدەتر ئالۆزبوونا گرژیێن رۆژهەلاتا
ناڤەراست.
وەزارەتا دەرڤە یا
تورکیا، هەرچەندە راستەوخۆ ئیسرائیل ب ئەنجامدەرێ وێ هێرشێ نەناساندیە، لێ ئەو
بوویەر ب بوویەرەکا نەشرین بناڤ کر.
ژ لایەکێ دی ڤە، هەر ئێک
ژ مەحمود عەباس سەرۆکێ فەلەستین و محەمەد مستەفا سەرۆک وەزیرێن فەلەستین، ئەو
بوویەر شەرمەزار کر.
ئەڤە ژی د دەمەکی دایە،
سپێدەهیا ئەڤرۆ تەڤگەرا حەماس ڕاگەهاند، ئیسماعیل هەنیە سەرۆکێ مەکتەبا سیاسی یا
تەڤگەرا وان د هێرشەکێ دا و ل جهێ مانا وی ل تەهران یا پایتەختێ ئیرانێ هاتیە
کوشتن و ئیسرائیل ب ئەنجامدەرێ وێ هێرشێ تۆهمەتبار کر.