AM:08:35:19/04/2024
732 جار خوێندراوەتەوە
+
-
رادیۆیا فەرمیا ئارتێشا ئیسرائیل ڕاگەهاند، چەند بنگەهێن سەربازی ل
ئەسفەهان ل ئیرانێ کرینە ئارمانج، کەنالا فەرمیا ئیرانێ ژی دبێژیت، چ هێرشان
بنگەهێن ئەتۆمیێن وان نەهاتینە ب ئارمانج گرتن.
شەڤا دەربازبووی، میدیایێن ئیران بەلاڤکرن، چەند هێرشەک لسەر وان
هاتینەکرن بۆ سەر چەند بنگەهێن سەربازیێن ئیرانێ ل ئەسفەهان و تەقینەک ژی ل
بالەفڕخانەیا وی باژێری روویدایە.
بەحسا وێ یەکێ ژی کرن، ئیرانێ ئەسمانێ ولاتێ خۆ داخستیە و گەشتێن بالەفڕان
ژی راگرتینە، پشترا کەنالا فەرمیا ئیران پشتراستکر.
ژلایێ خۆ ڤە ژی، پەیڤدارێ ئاژانسا ڤالاهیا ئەسمانیا ئیرانێ ئەو یەک
بەرچاڤکر، وان چەند بالەفرێن بێ بالەفرڤان ل ئەسمانێ ئیرانێ خستینە خار.
هەڤدەم، بەرپرسەکێ ئەمریکا بۆ فۆکس نیوزا ئەمریکی ڕاگەهاند، ئەمریکا
هایداری هێرشا ئیسرائیل بوویە بۆ سەر ئیران و بتنێ چەند بنگەهێن سەربازی کرینە
ئارمانج نەک بنگەهێن ئەتۆمی.
پشتی وان هێرشان رادیۆیا
فەرمیا ئارتێشا ئیسرائیل ڕاگەهاند، چەند بنگەهێن سەربازی ل ئەسفەهان کرینە
ئارمانج، گوت ژی، "ئەو بنگەهێن هاتینە ب ئارمانج گرتن ل وێرێ هێرشێن حەفتیا
دەربازبووی بۆ سەر ئیسرائیل هاتینەکرن.
ئێکشەمبیا دەربازبووی،
ئارتێشا پاسداران ب دەهان مووشەکان هێرشی سەر ئیسرائیل کر و پشترا ل لوبنان چەند
مووشەکێن دی ئاراستەی وی ولاتی کرن و ئارتێشا ئیسرائیل چوو حالەتێ ئامادە باشیێ.
پشتی وێ هێرشی، وەزارەتا
بەرەڤانیا ئەمریکا راگەهاند، وی ولاتی نەڤێت دگەل ئیرانێ بکەڤیتە هەڤڕکی و
ئالۆزیان، لێ یا رژدە لسەر پاراستنا هێزێن ولاتێ خۆ و پشتەڤانیا ئیسرائیل.