پارێزگارێ دهۆکێ ڕاگەهاند، پشتی دەربازبوونا نەهـ رۆژان تیمێن
بەرەڤانیا باژێرێ دهۆکێ شیاینە تەرمێ ئێک ژ وان کەسێن د لەهیا دهۆکێ دا ژیانا خۆ
ژدەستدای ببینن، دبێژیت ژی، "لێگەریان لدیف تەرمێ دی دا بەردەوامە".
ئەڤرۆ پێنجشەمبی، عەلی تەتەر پارێزگارێ دهۆکێ د
کۆنفرانسەکا رۆژنامەڤانی دا ڕاگەهاند، پشتی دەربازبوونا نەهـ رۆژان بسەر لەهیا
دهۆکێ ئەڤرۆ ل خانکێ شیاینە تەرمێ ئێک ژ وان کەسێن د لەهیا دهۆکێ دا بەرزەبووین
ببینن.
ئاماژە ب وێیەکێ ژیکر، د نها دا ژی چەندین تیمێن بەرەڤانیا باژێرێ
دهۆکێ مژیلی لێگەریانێ نە لدیف تەرمێ دووێ دا.
بەحسا وێیەکێ ژیکر، سوپاسیا هەمی ئالیان و وەلاتیێن خانکێ دکەن کو
هەڤکاریا تیمێن بەرەڤانیا باژێرێ دهۆکێ کرینە بۆ دیتنا تەرمێ وی وەلاتی.
د وێ دەربارێ ژی دا، بێوار عەبدولعەزیز پەیڤدارێ بەرەڤانیا باژێرێ
دهۆکێ بۆ ئێن ئاڕ تی ڕاگەهاند، ب تەمامی ناسنامەیا وی کەسی کو هاتیە دیتن نەهاتیە
ئەشکرا کرن. گوت ژی، "بزاڤان دکەن د زویترین دەم دا تەرمێ وی کەسێ دی بهێتە
دیتن کو بسەدەمێ لەهیا دهۆکێ بێ سەروجهـ بووین".
ئەڤە ژی د دەمەکێدایە، رۆژا ١٩ـی ئازارێ پیلەکا بهێز یا باران بارینێ
بەرەڤ هەرێمێ هات و سەقاناسیێ ژی ئاماژە ب وێیەکێ کر ئەگەرێ درستوبوونا لەهیێ
هەیە، ژلایەکێ دی ڤە ژی بسەدەمێ وێ لەهیا دهۆکێ کو چەند رۆژێن دەربازبووی ل دهۆکێ
دروستبوو، زیان ب نێزیکی هزار ٢٤٠ مال کەفت د وێ رێژەیێ ژی دا ١٧ مال ب تەمامی
هەرفین.