AM:09:34:03/02/2024
1392 جار خوێندراوەتەوە
+
-
شەڤا دەربازبووی ژ ئەنجامێ بۆمبەبارانا چار بەلەفرێن
نەنیاس بۆ سەر دەڤەرێن سنورێ دێرەزور شەش ئەندامێن گروپێن چەکدار ژیانا خۆ ژ
دەستدان و چار ئەندامێن دی ژی برینداربوون و دهەمان دەمدا سێ دەڤەرێن عێراقێ ژی
هاتنە بۆمبەبارانکرن و ب وێ سەدەمێ پێنج کەسان ژیانا خۆ ژ دەستدان و ١١ کەس ژی
برینداربوون.
ئەڤرۆ شەمبیێ، شەڤا ٢ێ شوباتا ئەڤسالە فەرماندەیێ
ناڤەندا ئەمریکا ڕاگەهاند، ب رێکا بالەفرێن شەڕی ڤە ٨٥ هێرش بۆ سەر گروپێن چەکدار
د ئاخا سوریا و عێراقێ دا ئەنجامداینە ب بکارئینانا ١٢٥ مووشەکێن جودا ل حەفت
دەڤەرێن عێراقێ و سوریا.
ژ لایەکێ دیڤە جۆ بایدن سەرۆکێ ئەمریکا دەربارەی وان
هێرشان ڕاگەهاند، د بەرسڤا کوشتنا سێ سەربازێن ئەمریکی ب فەرمانا وی هێرشان بۆ سەر
بارەگایێ گروپێن چەکدار د ئاخا عێراقێ و سوریا دا دەستپێکرینە و بەردەوام دبن هەیا
وی دەم و جهێ وان دیارکری. گۆت ژی، "کوشتنا هێزێن مە باجەکا گران دبیت و چ
بزاڤان بۆ دروستکرنا هەڤرکیان ل رۆژهەلاتا ناڤەراست ناکەین".
لهەمبەر داخۆیانیێن ئەمریکا و سەرۆکێ ئەمریکا دا یەحیا
رەسول پەیڤدارێ هێزێن چەکدارێن عێراقێ ڕاگەهاند، بۆمبەبارانێن ئەمریکا د ئاخا
عێراقێ دا ئالۆزیێن دەڤەرێ بەرفرەهتر دکەن و ئالۆزیێن هەرێمیێن رۆژهەلاتا ناڤەراست
دئینە عێراقێ جودا ژ وێ یەکێ کو بکارئینانا مووشەکان و بۆمبەبارانکرنا چەند
دەڤەرێن عێراقێ بنپێکاری بوویە لهەمبەر سەروەریا ئاخا عێراقێ.
هەڤدەم، جارەکا دی ئەمریکا ب رێکا کۆچکا سپی بەرسڤا
پەیڤدارێ هێزێن چەکدارێن عێراقێ دا و گۆت، چ بنپێکاری لهەمبەر ئاخا عێراقێ ئەنجام
نەداینە و پێشتر حکومەتا عێراقێ ژ وان هێرشان هاتیە ئاگەهدار کرن و ب هویری ژی ئارمانجێن
خۆ بۆمبەباران کرینە، د هەیاما ٣٠ خولەکان دا کو چار بارەگایێن چەک و تەقەمانیان
بووینە د ئاخا سوریا دا و سێ بارەگایێن چەک و تەقەمەنیان ژی ل عێڕاقێ
بۆمبەبارانکرینە.
رۆژا ٢٨ێ مەها دەربازبووی فەرماندەیا ناڤەندا ئەمریکا (سێنتکۆم)
ڕاگەهاند، بنگەهەکێ ئەمریکا لسەر سنورێ دناڤبەرا سوریا و ئوردن ب بالەفرا بێ
بالەفرڤان هاتیە ب ئارمانج گرتن و ب وێ سەدەمێ سێ سەربازێن ئەمریکی هاتنە کوشتن و
چەند سەربازێن دی برینداربوون.