PM:06:03:03/06/2023
3320 جار خوێندراوەتەوە
+
-
پشتی نێزیکی مەهەکێ ژ دائێخستنێ؛ بڕیارا
ڤەکرنا دەرازینکا سنوری یا سێمالکا هاتەدان کو ژ ئالیێ پارتی ڤە د روویێ رۆژئاڤایێ
کوردستانێ دا هاتبوو دائێخستن. رێڤەبەریا دەرازینکێ ژی دبێژیت، بتنێ دێ بۆ پەیوەندی
و رێکخراوێن مرۆڤی هێتە ڤەکرن و د نها دا
بۆ مەرەما بازرگانیێ ناهێتە بکارئینان.
شەوکەت بەربهاری، رێڤەبەرێ
دەرازینکا سنوری یا سێمالکا بۆ میدیایێن نێزیکی پارتی ڕاگەهاند، رۆژا دووشەمبیا
داهاتی دەرازینکا سنوری یا سێمالکا کو دکەڤیتە دەڤەرا پێشابیرێ ب روویێ رۆژئاڤایێ
کوردستانێ دا دهێتە ڤەکرن و بتنێ بۆ پەیوەندی و رێکخراوێن مرۆڤی دبیت و د نها دا
بازرگانی ل وی دەرازینکی ناهێتەکرن.
بەحسا وێیەکێ ژیکریە، ئەو کەسێن رێک پێ
بهێتەدان هاتن و چوونێ ل وێ دەرازینکێ بکەن پێکدهێن ژ ئەوین سۆزنامە و
رەگەزنامەیین بیانی هەنە و ئەوێن بەلگەنامەیێن مانا ل هەرێم و عێراقێ هەنە دگەل
نەخۆش و بیک و زاڤایان.
دیارژیکر، هاتن و چوونا وان کەسان ژی د
دەرازینکێ دا بتنێ رۆژێن شەمبی و دووشەمبی و چارشەمبی دبیت.
هەڤدەم، رێڤەبەریا دەرازینکا سنوری یا
سێمالکا ژ ئالیێ رۆژئاڤاڤە ژی بۆ ئێن ئاڕ تی پشتڕاستکر و گوت، بتنێ بۆ پەیوەندیێن
دیپلۆماسی دبیت لێ بۆ کارێ بازرگانی هێشتا چ بڕیار نەهاتنە دان و ناهێت زانین
کەنگی دێ ب تەمامی هێتە ڤەکرن.
ئەڤە د دەمەکێ دایە، ل
١١ی مەها دەربازبووی و ل دەما ڤەکرنا مۆزەخانەیا نیشتیمانی یا بازرانی رێڤەبەریا خۆەسەرا
رۆژئاڤایێ کوردستانێ رێگری ل شاندەکێ ئەنەکەسێ کربوو دەربازی هەرێمێ ببن و بەشداریێ
د رێورەسمێن ڤەکرنا وێ مۆزەخانەیێ دا بکەن، ڤێ یەکێ ژی بەرپرسێن پارتی تۆرەکربوو و
بڕیارا دائێخستنێ دابوون.