ئەڤرۆ شەمبیێ، هەرئێک ژ ئۆمێد محەمەد و مۆفەق حسێن، پەرلەمانتارێن
فراکسیۆنا نەوەی نوێ ل پەرلەمانێ عێراقێ، د هژمارا خۆ دا ل تۆرا جڤاکی ڕاگەهاندنەک
بەلاڤکرن و تێدا هاتیە، لسەر داخازا وان و پشتی بزاڤێن زۆر، شیان رەزامەندیێ ل وەزارەتا
ساخلەمیا عێراقێ وەربگرن بۆ دابینکرنا دەرمان و پێدڤیێن نۆژداری بۆ هەر ئێک ژ
نەخۆشخانەیێن نانەکەلی ل هەولێرێ و نەخۆشخانا پەنجەشێرێ ل کەرکوکێ و نەخۆشخانەیا
شەهید خالد گەرمیانی ل باژێرێ کفری.
ژ لایێ خۆ ڤە ئۆمێد محەمەد پەرلەمانتارێ فراکسیۆنا نەوەی نوێ ل پەرلەمانێ
عێراقێ ڕاگەهاندیە، "ژپێخەمەت کەرکوکێ" ، شیاین دەرمانێ جۆرێ Osimertinib
tablets،
بۆ نەخۆشخانا پەنجەشێرێ یا کەرکوکێ دابینبکەن، کو بهایێ وی دەرمانی گەلەک گرانە و
پێشتر نەخۆشخانەیێن کەرکوکێ دچۆنە باژێرێن دی ئەو دەرمان وەردگرت".
هەڤدەم، مۆفەق حسێن پەرلەمانتارێ نەوەی نوێ ئەشکرا کریە، پشتی دیڤچوونان بۆ
ئاریشە و پێدڤیێن نەخۆشخانەیا شەهید خالد گەرمیانی ل باژێرێ کفری، نڤیسارەکا فەرمی
ئاراستەی وەزارەتا ساخلەمیا عێراقێ کر بۆ دابینکرنا دەرمانێن پێتڤی بۆ وێ
نەخۆشخانەیێ.
د دەمێ دەربازبووی دا، ب هەمان ئاوا فراکسیۆنا نەوەی نوێ بزاڤکرن پێدڤیێن
نۆژداری و دەرمانان بگەهینتە نەخۆشخانەیێن سنورێ پارێزگەها هەلەبجە، لێ ب بڕیارەکا
حزبی رێڤەبەرایەتیا ساخلەمیا هەلەبجە هاریکاریێن نۆژداری یێن نەوەی نوێ رەتکرن.