AM:11:19:19/12/2022
1300 جار خوێندراوەتەوە
+
-
دەربارەی "رێڤەبەرێ بەرێ یێ نەخۆشخانا زاخۆ کو لسەر گەندەلیێ
هاتبوو لادان و گرتن"؛ سەرپەرشتێ ئیدارا زاخۆ دبێژیت، "لسەر هندەک
بابەتێن یاسایی هاتبوو گازیکرن و نها وەکی دکتور دەواما خۆ دکەت". د دەمەکێ
دا ژێدەرەکێ ژ نەخۆشخانا زاخۆ بۆ ئێن ئاڕ تی گرتن و لادانا وی رێڤەبەرێ بەرێ لسەر
گەندەلیێ پشتڕاستکربوو.
ئەڤرۆ دووشەمبی، دەربارەی رێڤەبەرێ بەرێ یێ ساخلەمیا زاخۆ "کو
ژبەر گەندەلیێ هاتبوو لادان و گرتن" د بەرسڤا پرسەکا ئێن ئاڕ تی دا گوهدار
شێخۆ سەرپەرشتێ ئیدارا زاخۆ ڕاگەهاند، بابەتێ وی دکتوری گەلەک نورمال بوو گوهۆرین
هاتە کرن و لسەر هندەک بابەتێن یاسایی هاتبوو گازیکرن و نها وەکی دکتور دەواما خۆ
ژی دکەت.
ئەڤە د دەمەکێ دایە، د هەیاما دەربازبووی دا ژێدەرەکێ ژ ساخلەمیا زاخۆ
بۆ ئێن ئاڕ تی ڕاگەهاندبوو، رێڤەبەرێ بەرێ یێ ساخلەمیا زاخۆ ب تۆهمەتا گەندەلیێ
لسەر کارێ وی هاتە لادان و پشتڕە هاتە دەستەسەرکرن.
هەڤدەم، هەر ئەڤرۆ ڕاگەهاندنا ئیدارا زاخۆ ڕاگەهاند، سامان بەرزنجی
وەزیرێ ساخلەمیا حکومەتا دەم بسەرڤەچوویا هەرێمێ سەرەدانا ئیدارا زاخۆ کر و دگەل
گوهدار شێخو سەرپەرشتێ ئیدارێ جڤیا و پشتڕە د کۆنفڕانسەکێ رۆژنامەڤانیدا رێڤەبەریا
گشتی یا ساخلەمیا ئیدارا زاخۆ هاتە ڕاگەهاندن و دکتور سیروان نەجار وەکی رێڤەبەرێ
گشتی دەست ب کاربوو.