سەرنووچە:

كەربا گەنجا

7/2/2020 6:21:02 PM
1762 جار خوێندراوەتەوە
ئەحمەد عەبدولا
+ -

ئەڤرۆ ھەکە تو ب ھیری سەحکەیە جادە و رەوشا ھەرێما کوردستانێ دێ بینی ئەو دەنگێ نەرازیێ بەرامبەر غەدر و بێدادییا کومەلاتی و ئەو گەندەلییا دھەمی سێکتەرێن ژیانا کوردەواری داگیرکری خودانێ وی دەنگی تەخا گەنجانە، وەسا بۆ مە دیار دبیت بێگومان ھێزا راستەقینە بۆ گوھورینێ ژی هەر تەخا گەنجانە، یا جھێ سەرنجێیە پەروەردا وی گەنجێ دناف کومەلگەھێ کوردی دا ھەر پشتی مێژووا سەرھەلدانا سالا ١٩٩١ لسەر بنیاتەکێ ساخەلەم و دیر ژ رەگەس پەرستیێ و دەمارگیریێ و رەخساندنا ژینگەھەکا ئارام بو ئاڤاکرنا مەژیەکێ بەرھەم ھێنەر و دویر ژ توندرەوی نەھاتی یە ئاڤاکرن، لێ ب مخابنیڤە ل شینا وێ ھەلمژینا پەروەردا گەنجا ھەر ل وێ مێژووا مە لسەری ئاماژێ پێدای پتر لسەر بنیاتێ بەرەلاییێ و ھەڤرکیێن پارتایەتیێن نەرەوا و کاریگەری یا «مسلسل» ئانکو زنجیرێن وەلاتێن بیانی وەکی ترکی و کوری ھندی و جیھانا عەرەبی، کەربا تەخا گەنجا ئەڤرۆ یا گەھشتی وی ئاستێ باوەریێ کو ھیج پیرۆزیەکێ ناسناکەت، دەرزەکا مەزن یا کەتی دنافبەرا وی و کەلتورێ کوردەواری دا ئەڤرۆ یاگەھشتی وێ راددی وەسا ھەستدکەت نشتیمان و ئاخ و ئالا و کەلتور و شەھید و کوردایەتی و سەرکردایەتی ئەگەرن بۆ بێ بەشکرنا وی ژ وێ خوشیا ئەو گەنجێن ھەف تەمەنێ وی ل جیھانێ بدەست خوڤە دئینن.

ژ ئەگەرێ بێ خەمیا دەسھەلاتێ بۆ پشتگۆھ ھاڤێتنا حەز و ئارەزوێت تەخا گەنجا و نەپەیداکرنا ژیانەکا بەختەوەر دێ بینی ژ نەچاری گەنج توشی پروسێسا کوجکرنێ بون ژ وەلاتێ خۆ بۆ وەلاتێن بیانی بۆ پەیداکرنا ژیانێ ژ ھەمی لایەکی ڤە ئەفجا گەنج ل وان وەلاتان وەکی کەلتورێ وی خەلکێ فێربین، بەشەکێ وان فێری کەرستێت بێھوشەکەر و مەی ڤەخارنێ بین بەشەکێ دی ب ئێکجاری ناسناما خۆ یا نەتەوایەتی ژدەست دا و بەشەکێ دیژی دکەنارێن دەریایا دا نوقوبین بنێ ئاڤێ بون خارنا نەھنگا بەشەکێ دی ژی شیان خۆ لبەر شەپولا کاریگەری یا جیھانگێریێ بگرن لسەر پێت خۆ براوستن و شیان مفای لخو کەسوکارێت خۆ بکن.

ھەروەسا بۆ جارا دووێیە دنڤێسینێن خودا ئاماژێ بڤێ خالێ دکەم کو ھەمی پارتێن سیاسی بێی جیاوازی لدەلیڤێن  پێتڤی مفا بخو ژ شیانێن گەنجا وەردگرن وە ھەروەسا گەنج وەکو کەرستەک و ئالاڤەکێ بازرگانی سەرەدەری دگەل کریە لدەمێ پێتڤیاتیا وان پێ نەما گەنج ئاڤێتی یە بۆ ناف جیھانا بێ کاریێ و بێ پارەییێ و بێخودان مایە.

نەریتەکی خراب ئەڤرۆ یێ بەر بەلاڤە لدەف پرانییا گەنجا ئەوژی دەمێ گەنج ئیرادە و ھزرو بیرێت خۆ رادەستی کەسێن سەر تەمەنێ خۆ دا دکەت ھەجییا ئەو بکەت ھەجییا بێژت وەکی ھاتی بێ فیلتەر وەردگرت دڤیا گەنجێ ھشیار نەرینا خۆ یا جیاواز ھەبا پتر لڤینێن ژێوارێ خو بھەلسەنگینت و مەژیێ خۆ رادەستی کەسێ نەکەت ژبەر کو ھەلبژارتنا نەرینا دورست نەگرێدای مەزنیێ و بجیکیێ یە.