سەرنووچە:

ھێشتا دیڤەلانکێ وانایی؟

6/19/2020 11:37:53 PM
2338 جار خوێندراوەتەوە
فیراس باکورمانی
+ -

ل دەستپێکێ دا ئەز بۆ ھەوە کورتی بێژم کا کەسێن کو پەیڤا دیڤەلانک دگریت کینە، دیڤەلانک ئەون ئەوێن ل دیڤ وان کەسا دچن ئەوێن دەستھەلاتدار و کار بدەست بۆ وێ چەندێ کو یێت گەھشتیە وان ھیڤی و حەزێن خوو، دیسان پەیڤا مەلاق ژی نێزیکە ژ دیڤەلانک لێ ژێدەرێ وێ پەیڤێ ژ عەرەبی ھاتیە (التملق) رامانا وێ ئەوە، جوان کرنا تشتێ کرێت و ڤەشارتنا راستیێ و پەسنا کەسێن نەھەژی ب باشی ب مەرەما خۆ نێزیک کرن و خۆ شرین کرنێ ل نک وان کەسان ب ھیڤیا وێ چەندێ بگەھیتە مەرەمێن خوو.

کارێ وان کەسان ئەوە دەما ل دەڤ سەرکردە و بەرپرسێن خۆ دئاخڤن وەسا بەحسا ژیانا خەلکی دکەن ھەر وەکی خەلکی چ ئاریشە نینە و شاما شەریفە تا وی رادەی کو ئەو بەرپرس باوەر بخو نەکەت ھندە یێ باشە دگەل خەلکێ خو!!، دیسان د ناڤ خەلکی دا و ل تورێن جڤاکی وەسا بەرەڤانیەکا دژوار ژ وان دکەت تۆ دێ وەسا ھزرکەی ل دەست پێکا ھەمی مەھان مووچەکێ فووووول (کامل) و بێگیروبوون وەردگریت تۆ نزانی ئەڤە چەندین مەھـ چوون ھێشتا مووچەک ژی وەرنەگرتیە یان ھەتا ل سەرا وان یێ بەرھەڤە ئاخاڤتنێت نەشرین بێژیتە نێزیکترین کەسێن خو ژ  پێخەمەت وێ چەندێ بەرپرسەک بێژیتێ تویێ زیرەکی کار و چالاکیێت تە دبینم تایبەت ل تورێن جڤاکی.

ڤێجا پشتی ڤێ ھەمیێ ئەو دێ گەرمتربیت ل سەر وێ مەلاقییێ و دێ زێدەتر خۆ نەشرین کەت ل دەڤ کەسوکار و ھەڤالێن خو، د ھەمان دەمدا ئەو نەیێ دل گرانە ژ وێ چەندێ بەلکو خۆ ب سەر بلند دبینیت ژی.

کرمێ دارێ دێ بەروڤاژی کەین بۆ کرمێ جڤاکی. ئەرێ (کرمێ) مەلاقی و دیڤەلانکیێ د جڤاکێ مە دا د چ ئاست دایە؟

 دەما کرم دکەڤیتە ناڤ دارەکێ دا ئەگەر جوتکار پێڕا نەگەھیت و ڕێکاران لھەمبەر ڤێ کرمێ نەگریتەبەر دێ ھەم زێدە بیت و گەھیتە قرومان و ھەم دێ ھێدی ھێدی ڤێ دارێ خوت و ھەتا دگەھیتە ئاستەکێ کو دێ ھشک و لاواز کەت و ژنڤابەت، ئەز مەلاق و دیڤەلانکان ژی ب کرمێ جڤاکی (کۆمەلگەھێ) ددانم، ژبەر کو ھەبوونا ڤان د جڤاکی دا ئەگەر نەھێتە چارەسەرکرن، ڕۆژ بۆ ڕۆژێ دێ زێدەبیت و دێ گەھیتە ھەموو جومگێن جڤاکی و دێ ھێدی ھێدی لاواز و خراب کەت ھەتا ب تەمامی وێران دکەت.

ھەلبەتە چ جومگە و تایێن ھەرێم و جڤاکا مە نەماینە ئەڤ کرمە نەگەھیتێ، پیرۆزی و رەوشت ژی نەھێلانە و دەست بۆ ھەمی لایا بریە، ب تایبەت د کایا دەستھەلاتێ دا، کو ئەڤرۆ وەلات لاواز و دژ ھەڤ و ب شەڕ و ناکوکیێ گەھاندیە، گەھشتیە ئاستەکی کو بەشەک ژ تاکێ ئاسایی، مەلا، مامۆستا، ئاغا و موختار و ھتد..، د وژدان و ئایدلۆژیا و باوەڕی و ھەبوونا مرۆڤ بوونێ دەرکەفتینە و چووینە باوەشا بەرژەوەندیا کەسوکی و مەرەمەکا تایبەت کو لسەر حسابا بەرامبەر و ھزاران مرۆڤان خۆ داینە خزمەتکرن و مەلاقیکرنەکا دوو ڕوویی بۆ کەسێ دەستھەلاتدار و خودان پایە.

دڤیت باش بزانین، کو پشکا شێرا خرابیا ڤێ ڕەوشا ئەڤرۆ ئەم تێدا، ژ ئەنجاما وێ چەندێیە کو ل جھێ خەلکەک دروست ببیت بۆ کارکرن ژبۆ بەرژەوەندی خزمەتکرنا گشتی و ڤیان و حەژێکرن بۆ ھەموو کەس و جۆرێن مرۆڤان د ھەموو ئاستان دا، بەروڤاژی پەرەپێدان ب کرمێ مەلاقیێ و پیسکرنا جڤاکی ھاتیە دان ب ڕەنگەکێ، ژبەر مەلاقیێ نەمەلا چووینە سەرمیمبەران، نەمامۆستا بووینە مودیر و مامۆستا و سەرۆکێن زانینگەھان، دیسان نۆژدار بۆ جھێن نەھەژی و نەبەرپرس و بێ ئەزموون بووینە سەر قافیلەیێن خەلکی و سەرفەرماندارێن ولاتی.

ژ تالانێ نیڤ ژی ڤەگەڕیت ھەر باشە

گرنگە باوەڕیێ بۆ ناخێ خۆ چێکەین و ھەمی ب ھەڤڕا دەستان بدەینە ئێک و ژ ڤێ نیڤ وێرانیا چێبووی ھەر ئێک ژلایێ خۆڤە بزاڤا باشکرنێ بدەت و ئەگەر ب خۆشی چێببیت چێکەین ئەگەر نە سنورەکێ بۆ بدانین ڤێجا ب ھەر بھایەکێ بیت، بەریا کو ئەڤ کرمە ژ ھەر کولان و مالەکێ دا بەلاڤ ببیت ل جھێ نیڤا تالانێ و وێرانیێ ھەر تشت ل دەست بچیت و یا ھەیی ژی ل دەست بدەین.