لاهور جەنگی لە پەیامەکەیدا باس لەوەدەکات، "نەوەکانی پێش ئێمە، یەکێتییان بۆ ئەوە دامەزراند ستەمی سیاسی لەسەر گەلی کورد لە کوردستاندا نەمێنێت، کەچی ئێستا ئیرادەی خەڵکی کوردستان لە رەهەندی سیاسی و ئابورییەوە لە پێناو ئەجندای ئیقلیمی ئەوەندە زەلیل کراوە، زۆرینەی ڕەهای خەڵکی کوردستان خۆزگە بۆ سەردەمی دیکتاتۆرەکانی پێشوو دەخوازن."

ئەوەشی خستووەتەڕوو، "وابڕیار بوو مانفێستی سۆشیال دیموکراتی و عەدالەتی کۆمەڵایەتی پەیڕەو بکەین لە کوردستان، کەچی لەبری ئەو مانفێستە بەرنامەی تیرۆر و تیرۆرکردنی خەڵکی کوردستان بووەتە ئەجندای ئەم (یەکێتییە نوێیەی) کە لەلایەن نەیارە سیاسییەکانمانەوە تەحەکومی پێوە دەکرێت. ڕۆژانە کادیرە هەرە پێشکەوتوو سەربازی و سیاسییەکانی خۆی دەستگیر و تیرۆر دەکات، باشە پێم ناڵێن لە کوێی مێژووی حزبایەتیدا لە سەرتاسەری ئەم جیهانەدا ڕوویداوە کە حزبێکی سۆشیال دیموکرات بە پیلان و پیلانگێڕی، لە پێناو ئەجندای ئیقلیمی و حزبی تردا، کادیری خۆی تیرۆر بکات."

لاهور جەنگی هۆکاری نەبوونی پەرچەکرداری سەربازیان لە رووداوەکانی چەند مانگی رابردووی یەکێتیدا بۆ پاراستنی "هەیبەتی شەهیدەکانیان و قیادەی سیاسی و حزبیان" دەگەڕێنێتەوە و رایدەگەیەنێت بۆئەوەی، "شار و شارۆچکەکانی کوردستان نەبن بە مەیدانی تەراتێنی سەربازی و ئەمنی بۆ نەیارەکانی ئەم جوگرافیایە"، باسی لەوەشكردووە، "بەڵام ئەمە بەو مانایە نایەت ئەم دانبەخۆداگرتنە تا سەر درێژە پێبدەین و قبووڵی بکەین کە ڕۆژانە بە بەرچاومانەوە هەڤاڵانی یەکێتیی وەحشیانە تیرۆر بکرێن."

لاهور جەنگی لە پەیامەکەیدا ئاماژەی بەوەکردووە، "توانای ئەوەمان هەیە دەرگای دۆزەخ بەسەر نەیارەکانماندا بکەینەوە و لەناو ئاگرەکەیدا هەموو سیناریۆچییەکان و کودەتاچییەکان هەڵپڕوکێنین و بە تووڕەیی جەماوەری یەکێتیی و جەماوەری کوردستان بە شەرعیەتی کۆنگرە و بە شەرعیەتی جەماوەری و حەقانیەتی سیاسی ئاگر لەسەر پشتی ئەو خوێنڕێژانە بکەینەوە کە بەرنامە داڕێژەری شەهیدکردنی هەڤاڵ موراد و هاوڕێکانی بوون."

وەک ئامۆژگارییەکیش داوا لە هێزە ئەمنییەکان دەکات، "خۆیان دوور بگرن لەو جۆرە تاوانانە، چونکە هەر کەسێک تاوانی کوشتن و تیرۆرکردنی خەڵکی لە ئەستۆ بگرێت لە هەر پلە و پۆستێکی حزبی و حکومیدا بێت، بە تایبەت لە تیرۆرکردنەوە تێوەگلابێت ئەوا باجەکەی لە ڕووی قانونییەوە زۆر قورس دەبێت و سزاکەی مەرگی ڕاستەقینەی عەدالەت دەبێت.ڕێگە بە خۆتان مەدەن بەکار بهێنرێن و پیلانی گڵاوی نەیارانی یەکێتیی و وڵاتانی ئیقلیمتان پێ جێبەجێ بکرێت."

هاوسەرۆکی یەکێتی رایگەیاندووە، "ئەم دۆخە دەگەڕێتەوە بۆ جێگەی خۆی و ڕووداوەکان بە زەبری شەرعیەتی سیاسی و پاڵپشت بە زەبری هێزە سەربازیی و ئەمنییەکانی ناو یەکێتیی و ئیرادەی پۆڵایینی خەڵکی کوردستان، پیلانی ئینقیلابچییەکان و سیناریۆی ژەهرخواردنەکان تێک دەشکێندرێت."

بە سەرکردایەتی یەکێتیش دەڵێت، "لە ژێر تاقیکردنەوەیەکی قورس و مێژوویی دان، چونکە بە بەرچاوی ئەوانەوە و بە پشتیوانی لایەنێکی نەیار کە دەزگای حکومیشیان خستووەتەگەڕ بۆ پاڵپشتی و جێبەجێکردنی پیلانەکان و توانەوەی یەکێتی"، ئەوەشی خستووەتەڕوو، "لە مێژوودا حزبەکە قۆناغی وای بەخۆیەوە نەبینیوە."

ئەمە لەکاتێکدایە، ئێوارەی دوێنێ لە رانیە مورد کانی کوردەیی فەرماندە لە ناو ریزەکانی یەکێتی درایە بەر دەسترێژی گولـلە و لە ئەنجامدا خۆی و دوو پاسەوانی کوژران و پاسەوانێکی دیکەشی برینداربوو.

دوابەدوای رووداوەکەی شەوی رابردوو، ئەنجومەنی ئاسایشی ھەرێمی کوردستان لە روونکردنەوەیەکدا ئاماژەی بەوەکرد، "سەرلەئێوارەی ئەمڕۆ ٢٥ی ١١ی ٢٠٢١ ھێزێکی فەرمی بۆ جێبەجێکردنی بڕیاری دادگا و سەروەریی یاسا بۆ دەستگیرکردنی داواکراو (موراد کانی کوردەیی) لە شاری رانیە بەشێوەیەکی مەدەنی و یاسایی ئەرکی دەستگیرکردنی ناوبراویان پێسپێردرا".

موراد کانی کوردەیی فەرماندەیەکی نزیک لە لاھورجەنگی بووە و بەڕێوەبەری پۆلیسی نەھێشتنی تاوانی راپەڕین بووە و چەند رۆژێک بووە لە پۆستەکەی لادراوە و گواستراوەتەوە بەشی لێکۆڵینەوە ی پۆلیسی راپەڕین.

لەو بارەیەشەوە بنەماڵەکەی راگەیاندراوێکیان بڵاوکردەوە و ئاماژەیان بەوەکرد، "موراد بە برینداری لە لایەن چەکدارەکانەوە رفێندراوە و دوای شەش کاتژمێر پەیوەندی بە کەس و کارەکەیەوە کراوە و پێیان وتوون برۆن تەرمەکەی لە پزیشکی دادی لە شاری سلێمانی وەرگرنەوە، دوای وەرگرتنەوەی تەرمەکەی و توێکاری پزیشکی، دەرکەوتووە فیشەک بەرقاچی کەتووە و نەمردووە، بەڵکو دوای قۆڵبەستکردنی بە برینداری بردوویانە و دواتر لەژێر ئەشکەنجەدانێکی زۆر گیانی سپاردووە."

دەشڵێن، "بەپێی راپۆرتی زارەکی پزیشکی دادی کە لە کۆیە دووبارە بۆی ئەنجام درایەوە، دەرکەوتووە، شوێنی لێدانی کارەبا لەسەر دڵی و شوێنی چەقۆ و برینەکانی سەر جەستەی بەتایبەت بە پشت و ملیەوە و ھەڵواسینی ھەردوو دەستی بە روونی دەرکەوتووە کە لە ژێر ئەشکەنجەدا گیانی سپاردووە".

بنەماڵەکەی موراد هەڕەشەی تۆڵەکردنەوە دەکەن و دەڵێن، پرسە بۆ کوڕەکەیان دانانێن.

کێشەی نێوان هاوسەرکانی یەکێتی بۆ ٨ی تەمموز دەگەڕێتەوە و هیشتا چارەسەر نەبووە بافڵ تاڵەبانیش لەسەرەتادا داوای دەکرد لاهور جەنگی بچێتە دەرەوەی وڵات.

لە دوای شەوی ٨ی تەمموزەوە، بافڵ تاڵەبانی سەرۆکی هەردوو دەزگای زانیاری و دژەتیرۆری گۆڕی و دواتر لاهور جەنگی بە چەند بابەتێک تۆمەتبار کرد. کێشەکان گەیشتنە ئەو شوێنەی میدیای فەرمی یەکێتی لاهور جەنگی بە هاوسەرۆک ناونەدەبرد و لاهور جەنگیش دەستبەرداری پۆستی سەرۆکی هاوپەیمانێتییەکەی نێوان یەکێتی و گۆڕان بوو کە بۆ هەڵبژاردنەکانی پێشوەختەی عێراق لە مانگی تشرینی یەکەمدا پێکەوە بەشدار بوون و قوباد تاڵەبانی بە سەرۆکی هاوپەیمانێتییەکە دانرا.

هـ.ئـ