ئەو پارتا هەمی دەما دژی گۆتارا خوە!

3308 جار خوێندراوەتەوە

ھەتا دوهی سەروکێ پارتی دیموکراتی کوردستان مسعود بارزانی ، دادگەها فیدڕال ب (محکمة الثورة ) وەکو ئیهانە بناڤ دکر، چونکی بڕیارەک یان چەند بڕیارەک بەرۆڤاژی بەرژەوەندیێن وێ پارتێ دان، لێ ئەڤرۆ هەمان پارت، هەمان دادگەهێ وەکی پەناگەها تەنگاڤیا دبینیت و سکالایێن خوە و ل گور بەرژەوەندیا خوە لێ تومار دکەت!، کو ئەو ژی تومارکرنا سکالایا سەرۆک وەزیرێ دەم بسەرڤەچووی یێ هەرێما کوردستانێ ( مسرور بارزانی)، دەربارێ کورسیێن کوتا و پاشئێخستنا هەلبژارتنا، لێ ئەڤ چەندە یا سەیر نینە، چونکی هەمی دەما پارتی دیموکراتی کوردستان دژی گوتارا خوە بوویە! و ل گورەی پێشهات و کاودان واقعی ازدواجیەت

( دوو فاقی) ئێخستیە دگوتارا خوە دا، دیروک دیدەڤانە لسەر ڤێ چەندێ، بۆ نمونە 31 ئاب هەمان تاس و حەمام بوو، کو پارتی بناڤێ نەتەوەو و کورد پەروەری و ڕزگارکرنا مللەتێ کورد بناڤ شوڕەش دژی ڕژێما بەرێ یا عێراقێ و سەدامێ گۆر ب گوڕ دکر لێ سەروکێ هەمان پارت کو سەروکێ هەرێمێ یێ وی دەمی مسعود بارزانی بوو.

ل 31 ئاب دەست دگەل ڕژێمێ تێکەل کر و دەبابێن سەدامی ئینانە، د هەولێرێ دا ژ بۆ لێدانا یەکێتی، هەتا ڤێرێ ئاساییە و لدەف مللەتێ کورد و دوژمنا و دیروکێ ژی سەرەدەریا ڤێ پارتێ سەیر نینە چونکی ئەڤ پارتە قەزیێن مەزن یێن نەتەوی و دەولەت و مان و نەمانا مللەتێ کورد وەکو بازاڕەکێ ڕەش دبینیت!! و هندی بشێت ژ ڤی بازاڕێ ڕەش د چنت و دخوت ، ب هەر ڕێکەکا هەبت، "الغایة تبرر الوسیلة" یا ماکیافیلی مەزنترین سلوگانا پەردەکری! یا ڤێ پارتێ یە، لێ یا سەیر ئەوە دەمێ هندەک کەساتی و لایەنێن ئوپوزسیون یێن هەرێمێ سکالا ل دادگەها فیدڕال تومار کری دەربارەی بودجە و مووچەیێن فەرمانبەران کو ڕاستەوخو ژ لایێ حکومەتا مەرکەزی ڤە بهێنە دان، هەر ئێکسەر ماکینەیا ڕاگەهاندنا پارتی و کەنال و پەیچێن سیبەر یێن سەر ب وێ پارتێ ڤە، هێرش لسەر سکالاکاران ئەنجام دان و ب خاین و خوە فروش و جاش و هەڤالبەندێن دوژمنی ل قەلەم دان، و سومعەیا ئەژدادێ وان لەکەدار کر، یا ژ ڤێ ژی سەیر تر و دل ئێش تر، جەماوەرێ ڤێ پارتێ ژی هەمان دەهول و زڕنایا سەرکردێن خوە لێدان و جیاوازیا لایەنێن سکاڵاکار و حەشدا شەعبی و داعشێ دچاڤێ وان دا نە بوو، هێشتا سەیر تر، هەمان جەماوەر دنهادا سکالایا سەروک وەزیرێ دەم بسەرڤەچووی، ب کارەکێ دروست و حەکیمانە! دبینیت و دپەژرینیت، ئاخر ئێک ژ دووایە،، یان لایەنێن ئوپوزسیون نوکەر و جاشێن دوژمنی نە، یان سەرکردێن پارتی، ما گەلو چێدبیت مروڤ ل نالا ژی بدەت و ل بزماڕا ژی؟! بۆچی هوین یا خوە ب سیاسەت و حیکمەت دبینن و یا غەیری خوە ب جاشاتی و خوە فروتن؟، ئەم هەمی دزانن کو د سیاسەتێ دا چ هەڤالبەند و دوژمنێن هەتا هەتایی نینن، دەم و جهـ و واقع و کاودان بڕیارێ ددەن کی هەڤالە و کی دوژمن، لێ ئەڤ چەندە قەت نابیت لسەر حسابا قەزیا مللەتێ کورد و ماف و ئازادیێن وان بهێتە دان.