AM:09:48:24/11/2023
1288 جار خوێندراوەتەوە
+
-
بەرێ سپێدەهیا ئەڤرۆ، پشتی ٤٨ رۆژێن شەری و دۆرپێچکرنێ
ئاگربەستێ ل غەززە دەست پێکر و بڕیارە، هەتا چار رۆژان بەردەوامبیت و پشتی نیڤرۆیا
ئەڤرۆ دەست ب لهەڤگوهارتنا دیلان بهێتە کرن.
ئەڤرۆ ئەینی، ب نێڤەندگیریا قەتەر شەڕ ل غەززە هاتە
ڕاگرتن و بڕیارە ل دەما چار رۆژێن وێ ئاگربەستێ دا ٥٠ دیلێن ئیسرائیلی بهێنە ئازاد
کرن و ل هەمبەر هەر ئێک ژ وان ژی سێ دیلێن فەلەستینی رادەستی حەماس بهێنە کرن.
ژ ئالیێ خۆڤەژی گروپێ چەکداریێ عزەدین قەسام یێ
سەر ب گروپێ حەماس راگەهاند، ژ دەمژمێر ٧ـێ سپێدێ ڤە هەمی ئەرکێن چەکداریێن خۆ ل غەززە
راگرتینە.
دەربارەی ئازادکرنا دیلێن وان ژی بەحسا وێ کریە،
د دەما چار رۆژاندا بەرهەڤن ٥٠ دیلێن ئیسرائیلی ئازاد بکەن کو هەمی ژن و زارۆکن و لهەمبەر
هەر ئێک ژ وان ژی ئیسرائیل دڤێت سێ دیلێن فەلەستینی ئازاد بکەت.
هەڤدەم، نڤیسینگەها بینیامین ناتانیاهۆ سەرۆکوەزیرێن
ئیسرائیل بەلاڤکر، چاڤدێریا ئاگربەستێ و ئازادکرنا دیلێن ئیسرائیلی دکەن و دگەل کەسوکارێن
دیلان د پەیوەندیێ دانە.
شەڤا دەربازبووی بەری دەستپێکرنا ئاگربەستێ،
ئاژانسا نووچەیا فەلەستین بەلاڤکر، ژ ئەنجامێ بۆمبەبارانا سوپایێ ئیسرائیل بۆ سەر
قوتابخانەیا ئەبو حوسێن کو ژمارەیەکا ئاوارەیان تێدا ئاکنجی بوون ٢٧ کەسان ژیانا
خۆ ژ دەستدان و ٩٣ کەس ژی بریندار بوون.
لدیڤ داوی ئاماران ژی، ژ دەستپێکا شەرێ دناڤبەرا
حەماس و ئیسرائیل هەیا نها ١٤ هزار و ٨٥٤ کەسان ل کەرتێ غەززە ژیانا خۆ ژ دەستدانە
کو زێدەتری شەش هزار و ١٥٠ کەسان زارۆکن و نێزیکی چار هزاران ژنن.
ئەڤە د دەمەکێدایە، شەرێ حەماس و ئیسرائیل ژ ٧ـێ
مەها دەربازبووی ڤە بەردەوامە و پشتی دەستپێکرنا هێرشێن حەماس، سوپایێ ئیسرائیل بەردەوامە
ژ بۆمبەبارانکرنا کەرتێ غەززە و دۆرپێچکرنا وی باژێری.