AM:10:36:23/05/2022
868 جار خوێندراوەتەوە
+
-
شارەزایێنسەقاناسیا عێراقێ ڕاگەهاند، ئەڤ پێلا تۆزبارینێ یا بەرەف هەرێم و عێراقێ هاتی، دەمێ چڕترین ئاستێ تۆزبارینێ ل ئەڤرۆ دێ دەمژمێر ١١ی سپێدێ بیت و ل دەمژمێرێن شەڤێدا باندوری دێ لاوازبیت. دبێژیت ژی، "پشتی وێ یەکێ کو پێلەکا دیا تۆزبارینێ کو چڕیا وێ کێمتر بیت پارێزگەهێن نەینەوا و سەلاحەدین ڤەگریت و دێ گەهیتە باژێرێ بەغدا ژی".
ئەڤرۆ دووشەمبی، سادق عەتیە شارەزایێ سەقاناسیا عێراقێ ڕاگەهاند، ئەو پێلا تۆزبارینێ یا بەرەف هەرێمێ و عێراقێ هاتی ب درێژاهیا ئەڤرۆ دێ بەردەوامبیت و دەمێ چڕترین ئاستێ تۆزبارینێ ژی ل ئەڤرۆ دێ دەمژمێر ١١ی بەری نیڤرۆ بیت.
ئاماژە ب وێ یەکێ ژی کریە، بسەدەمێ تۆزبارینێ دویریا دیتنێ ب رەنگەکێ بەرچاڤ دێ کێمبیت، ل دەمژمێرێن شەڤێدا باندوریا تۆزبارینێ هێدی هێدی لاوازبیت و سەقا دێ باشتر بیت، لێ باشبوونا رەوشێ دەمکی دێ کێمبیت ژبەرکو پێلەکا دیا تۆزبارینێ بەرەف پارێزگەهێن نەینەوا و سەلاحەدین و بەغدا هێت.
سادق عەتیە دبێژیت ژی، چڕیا پێلا دی دێ کێمتر بیت بهەڤبەرکرن ب وێ پێلا نها بەرەف وەلاتی هاتی.
هەروەسا دەربارەی دەمێ ب داوی هاتنا ڤێ پێلا تۆزبارینێ، شارەزایێ سەقاناسیا عێراقێ دیارکر، سوبەهی رۆژا سێشەمبی باندوریا تۆزبارینێ دێ لاوازبیت و لەزاتیا بای دناڤبەرا ٥٠ بۆ ٦٠ کیلۆمەتراندا بیت د دەمژمێرەکێدا.
دەربارەی پلەیێن گەرمێ ژی، بەحسا وێ یەکێ کریە، ل تەڤایا وەلاتی پێنج پلە ژ پلەیێن گەرمێ دێ داکەڤن و ل باژێرێ بەغدا ژی دێ گەهیتە ٣٤ بۆ ٣٥ پلەیێن سەدی.
ئەڤە ددەمەکیدایە، شەڤا دەربازبووی، سەرۆکاتیا جڤاتا وەزیرێن عێراقێ د ڕاگەهاندنەکێدا ئاماژە ب وێ یەکێ کریە، مستەفا کازمی سەرۆک وەزیرێن عێراقێ بڕیاردایە ب راگرتنا دەواما فەرمی ل تەڤایا سازیان ژبلی کەرتێ ساخلەمیێ و هێزێن ئەولەکاری.