PM:11:31:22/05/2022
4064 جار خوێندراوەتەوە
+
-
لدویف زانیاریێن نووچەگەهانێ ئێن ئاڕ تی ل هەولێرێ، ل دادگەها پێداچوونێن هەولێرێ، هێزەکا ئەولەکاری کو جلوبەرگێن رەش دبەردابوون رێگرێ کر ل مەراسیمێن لێکگوهارتنا سەرۆکێ دادگەهێ و لادانا سەرۆکێ نها و دەستبکاربوونا دادوەرێ نوی وەک سەرۆکێ دادگەهێ، سەرۆکێ بەرێ یێ دادگەهێ ژی دبێژیت"ل دەمێ بهێت دێ زەلالکرنەکا پێدڤی دەم".
ئەڤرۆ ئێکشەمبی، موراد سورچی نووچەگەهانێ ئێن ئاڕ تی ل هەولێرێ ئاماژە ب وێ یەکێ کر، لدویف گوتنا شاهدحالان د وی دەمیدا، "ئومێد موحسین"، بەرەف دادگەها پێداچوونان چوویە بۆ وێ یەکێ وەک سەرۆکێ نوی یێ دادگەهێ کارێ خۆ بکەت، هێزەکێ کو بەریا نها لناڤ دادگەهێ نەهاتینە دیتن رێگریێ دکەن ژ وێ یەکێ دادوەرێ نوی دەستبکاربیت.
شاهدحالان بەحسا وێ یەکێ ژی کریە، سەرۆکێ دادگەها کو بڕیارا لادانا وی هاتیە دان، برایەکێ وی لناڤ هێزێن ئەولەکاری کاربدەستە و دبیت لسەر داخازیا برایێ وی ئەو هێزە بربیتە ناڤ دادگەهێ، ژبەرکو قەبیل نەکریە جهێ خۆ بجهبهێلیت.
هەڤدەم پشتی وێ یەکێ، دادوەر "برایم ئیسماعیل حمد" سەرۆکێ دادگەها پێداچونێن دەڤەرا هەولێرێ د ڕاگەهاندنەکێدا بەحسا وێ یەکێ کر، "بەرۆڤاژی بڕیارا گوهڕانکاریێن سەرۆکاتیا دادگەها پێداچوونێن دەڤەرا هەولێرێ کو ژ ئالیێ سەرۆکێ جڤاتا دادوەری هاتیە ئەنجامددان نەیاساییە".
بڕیارا گۆهڕینا سەرۆکێ دادگەها پێداچوونێن هەولێرێ پشتی وێ یەکێ دهێت، رێڤەبەریا کاروبارێن دادوەران ل جڤاتا دادوەریا هەرێما کوردستانێ ب نڤسیارا هژمارە ٢٧٩ کو ل رۆژا ١٥ی ٥ی ٢٠٢٢ێ دەرچوویە، بڕیارا داویئینان "ب ئینتیداب کردن" ئانکو لادانا "برایم ئیسماعیل" وەک سەرۆکێ دادگەها پێداچوونێن هەولێرێ، دانانا "دادوەر ئومێد موحسین" وەک سەرۆکێ نوی یێ دادگەها پێداچوونان، کو بەریا نها پەیڤدارێ جڤاتا دادوەری بوو.
دگەل وی بوویەرێ، ژێدەرەکی بۆ ئێن ئاڕ تی ڕاگەهاند، ئەو بوویەرا لناڤ دادگەهێ روویدایی، بۆ وێ ڤەگەڕاند ئاریشەیێ زێدەتر پەیوەندی ب ئاریشە و ململانێیێن ناڤخۆیێن ناڤ پارتی هەیی وەک ئاریشەیەکا ئاسایی دناڤبەرا دوو دادوەراندابیت.
هەڤدەم، دادگەها پێداچوونێن هەولێرێ هەمان ئەو دادگەهەیە ل دەمێ دوو سالێن دەربازبووی بەردەوام چالاکڤانێن بەهدینان تێدا هاتینە دادگەهکرن.